Shillong, Nohprah 09: Ka United Democratic Party (UDP) bad ka Hill State People’s Democratic Party (HSPDP) kiba donlang hapoh ka lama jong ka regional democratic alliance (RDA) ki ki la pyntip ba kin sa ïakynduh biang ha ka 11 tarik mynta u bnai, ba kin shim ïa ka rai la kin ïatreilang ne em ha ki elekshon MDC ban sa long ha Khasi bad Jaiñtia Hills.
Hadien ba la pynlong ïa ka jingïalang u Working President jong ka UDP bad u MDC ka Sohra u Bah Titosstarwell Chyne u la ong, “Ngi la rai ban ïakynduh biang ha ka 11 tarik mynta u bnai, ban ïarai khatduh ïa ki kam kiba ïadei bad ki elekshon MDC la ngin ïatreilang ne em bad kumjuh ban pynïeng ïa ki kyrtong ha ki constituency bapher bapher.”
“Ngin ïakhun na baroh ki 29 tylli ki seat. Ngin hap ban ïapynbeit lang bad ki paralok jong ngi ka HSPDP ha ki katto katne ki constituency bad ïa kane ka rai yn sa shim ha ka 11 tarik mynta u bnai,” u la bynrap.
Haba ong ba ka RDA ka don ïa ka lad ban jop kham bun ha kane ka elekshon ADC, u Bah Chyne u la ong ba ka UDP kan sa thaw ïa ka EC ba thymmai bad ka HSPDP ha ki district council.
“Ngi la don ka lad kaba biang bha khamtam ka UDP ha baroh kawei ka district, katba ka HSPDP ha West Khasi Hills bad katto katne ki constituency ha East Khasi Hills. Ngi don ïa ka lad kaba biang bha ha kine ki elekshon ban wan.”
Haba banjur ba ïa ki elekshon ADC yn ym lah ban ïanujor bad ka elekshon Lok Sabha u bah Chyne u la ong, “Kane ka long kaba iapher bad phin sa ïohi ïa ka jingmih kaba ïapher ha kine ki elekshon MDC.”
“Nga tharai phi tip bha ïa ka jinglong jingman shaphang ka jinglah ka jong ngi kumba ka long mynta. Nga don ka jingkyrmen ba ka UDP bad HSPDP kin lah ban leh bha ha kine ki elekshon ban wan,” ong u Bah Chyne da kaba bynrap ruh “Hapoh ka district council, ka UDP kam don bynta bad ka sorkar bad ngi don ha ka liang pyrshah. Namar kata ngan ïakhun ïa kane ka elekshon kum u dkhot ka liang pyrshah.”
Haba kylli une u nongïalam ka UDP u la batai lypa ba kin ym don ki seng saiñ pyrthei ki ban ïoh ïa ka jingjop kaba bun hapoh ki elekshon sha ki ADC.
“Phin sa ïohi ïa ki jingjubab kiba ïapher namar ka elekshon MDC ka shaniah ha ka jinglong bad jingtreikam bha u kyrtong bad khlem artatien ba ka party ruh ka don la ka jong ka bynta bad phin sa ïohi ïa ka jingmih kaba ïapher,” u la ong.
Na ka liang u Bah Chyne u la kyntait pat ban kren halor ka jingmih jong ka seng VPP ba ka lah ban ktah ïa ki seng saiñ pyrthei kum ka UDP, HSPDP bad u la ong, “Ngam kwah ban kynthoh eiei shaphang kiwei pat ki party. Ngi dang mynta ha ka kam ban pynkhreh ïa ka elekshon MDC ka ban sa long jong ka seng jong ngi bad kumjuh ruh ka RDA.”
Ha kawei pat ka liang u President ka HSPDP u Bah KP Pangniang u la ong ba um don jingtip bad ki arngut ki MLA ka party kin leit ban pynïasoh bad kiwei pat ki party.
“Kam don satia ka jingkylli ba baroh ki MLA jong ka seng kin ym ai ka jingkyrshan ïa ki kyrtong. Ki dang don bynta beit bad ka party bad kumjuh ruh bad ka RDA,” u la ong.
