Ki samla ha kane ka juk ba mynta ki la shah lyngsdhop ha kiba bun ki jingma bad jingpynshoi kiba bam kruiñ ïa ka jingim jongki, kat shaba ki phai ki shu shah rong noh kata ka jingim samla kaba kordor ka jong ki, kampher la dei kynthei ne shynrang, kine shu hai hai, la shu im sngi ha ka sngewbha ka sngewmiat, ki klet la ïing ki klet la sem, thik la kum kito ki kulai set sem, wei ba la lait ym thikna lano ba kin wanphai biang noh sha la jong ka sem.
Ka jingeh kaba man la ki thliew ïing ki mad bad ki shem ka long ba ki khun samla da lei lei kim kloi ban shong ban ïa syllok bad la ka jong ka ïing ka sem, to sdang ban kren ïa kaei kaei kaba bha, ki samla, kin sngap da ka kor kyllut bad kin khang tala ïa la ka jong ka bor jabieng ba kan nym ïoh satia ban rung ki tien sneng ki tien kraw, kane ka pynkthang bha ïaka mynsiem jong ki longïing ki longsem, namar kat kaba kren, ki samla, ki pyrshang ban pynïeng ïala ka jong ki ñia ki jutang ka jong ki, kaba teng teng da jngan shisha ban jubab haba ki buh ïa ka jingkylli.
Ki seng ñiam ruh ki mad lem ïa kum kane ka juh ka jingeh, kam pher wat ba ki la pyrshang ban shim ïa la ka kamram ban long ki nongsneng ki nongkraw, khang ban im ban beit hok da kaba biang ka jingim long samla kaba pura. Wat haba la pyrshang ban pynlong ïa ki prokram ïa-lum lang, ki samla kiba poi, lehse ki la shu leit tang ban shu leit ban pyndep rukom, ne ba don palat kata ka jingshah pynbor kaba kim lah ba kin khih shuh, dei ha ki jingleit kiba kum kine, haka jaka ban tei ïa ka nongrim long briew kaba skhem shah ber bih pynban ha kiwei pat ki para samla, da kumta kane ka ïai bteng tad haduh ba ka jylla mynta ka don ha ka khim khait bad bym nang shuh ban batai da kumno ban lah ban tem ïa kum kane ka jingim long samla ki khun ba mynta.
Kum ka jylla, kiei kiei kiba ka juk shai ka don mynta, ki khun samla, kim phai ïala ki khmat sha ki kam kiba bha, hynrei ki da tlot ka mynsiem bad ka bor pyrkhat ka jong ki, da kaba ki shu shah patan la kum ki blang ki masi sha ki ahor jong ka jingsniew, kaba kane nabar ka thaba ka da phyrnai khlek khlek, ka pynshoh biej da ki har rukom ki rong ki rup, ka pyn matlah jubor ïa ki khmat bad ka da pynking ïaka janor ki khun samla, ba ïa ka ba bha kin kiar rai maw raidieng, hynrei ïa kaba sinew, ba kin kloi ba kin kdup ba kin piam hala ka jong ka kut shadem. Haba ki la sdang ba kin ngop ban kren ban khana ïa ki ruh da hap ban pyrkhat arsien, namar haba ki la shah pynngop, ki klet syndon ïala ka jong ka raiñ ka rem, kim tip la tymmen ne la rangbah, pynban ki ktien ba kin kren, ka da pynïamrem shisha ïa ki ba la heh la san bad kaba kut la shu shah kynnoh ei ka ïing ka sem baroh kawei.
Kumta lada ki khun samla ki ïai bteng ban im ha kum kne ka jinglong kaba mynta, ka jingma kaba wan ba kan ap kadei ïa laka jong ka jaidbynriew, namar lada ki khun samla, ki la shong synjor, u nongwei u nongar u ap hi kmang satang lano ba kin kyllon bad hadien kane un sa ïoh ban kurup bad ban sdang ban lam khmat ha kiba bun ki liang.
Tang kum ka nuksa ïa kawei na ki jylla kiba marjan, ba u trai ri u trai muluk u kylla long u rit paid, haba u ïeng ban dawa ïala ka jong ka hok ka nongkynti ba la buh bad sam bynta ki longshwa ki manshwa, ki shah ñion bad shah thom da ka bor, namar ba ka jinglong ba rit paid ka dei ka dak kaba kim lah shuh ban khie la ka jong ka khlieh naka bynta ban kamai ka nongkynti ba dei hok ka jong ki.
Kumta ki khun samla jong kane ka jylla, kin hap ban ïeng ban kyndit bynriew sa shisien pat, kin plied la ki jong ki khmat bad ba kin pynïar noh ïala ka jingmut ka jingpyrkhat ba ka por ka la dei shisha ïa ki ba kin kyndit bynriew, namar ba ki sngi kim slem shuh ba lada ïai bteng sah ban im kum kane ka jingim kaba mynta, yn kylla long mraw shisha hala ka jong ka ri, kaba ki longdien hi kin mad ïaka jingeh bad ka jaidbynriew ka lah ba kan shah rong noh na kine ki er-lang-thari kiba wan ban lyngshop ha kane ka juk kaba mynta. U riew tymmen u la dep ban ïohi lypa ïa kane ka juk kaba mynta, bad u la shim khia ba un maham lypa lyngba ki khana puriskam, ha ki phawar bad kumjuh ha ki sur jingrwai, namar u tip ba dei tang kine ki kam, kiba lah ban tabah ha ka met ka longrynïeng jong ki khun samla, ba kin kynmmaw ban im sngi ban sharia ïala ka jong ka ri bad ka jaidbynriew, ba kin long ki nongïada kiba peitngor ban im sngi naka bynta ban pynneh ïala ka jong ka riti ka dustur, ïa la ka ñiam ka rukom bad ruh ban long ki nongpahara khnang ba kin longdien kin ïoh ban diang ti ïaka nongkynti kaba dei hok kat kum ba la buh la seng da ki longshwa ki manshwa.
