Nongpoh, Naiwieng 01: Ki paidbah jong ki 10 tylli ki shnong ha ka thaiñ Tasku mynta ka sngi ki la pynpaw ka jingkmen kaba khraw, kaba dei hadien ba ïa ka Health Sub Centre ha Tasku la wan ban plie paidbah noh da u MLA ka Jirang Constituency, u Bah Sosthenes Sohtun.
Kum ban pynkynmaw, kane ka Health Sub Centre ha Tasku ka dei ka ba la tei la bun phew snem mynta ha kaba la shu iehnoh jyndat khlem da pyntreikam bad ka dang treikam tang ha kine ki 2 snem ei ei, hynrei da ka jingshm khia u MLA ka Jirang kane ka Health Sub Centre ka la treikam mynta bad ba la lah ruh ban plie paidbah noh mynta ka sngi hapdeng ka jingdon jong ki paidbah nongshong shnong na ki 10 tylli ki Shnong.
Haba plie paidbah ruh ïa kane ka Health Sub Centre la don ryngkat ruh u MDC ka Jirang, u Bah Victor Rani, u Chairman ka Synjuk ki 10 Shnong, u Bah L. Lapang, ki doctor bad ki Nurse ha ryngkat ki riew rangbah bad ki nongïalam Shnong na ki shnong bapher bapher ba hap ha ka thaiñ Taksu ha Ri Bhoi.
Haba kren ruh ha kane ka sngi, u MLA ka Jirang u la ai khublei ïa ki paidbah bad ruh ïa ka sorkar jylla, namar dei lyngba ka jingïatrei lang la lah ban plie paidbah noh ïa kane ka jaka ai jingsumar ka ban sa ai jingmyntoi ïa ki paidbah jong ki 10 tylli ki shnong ha ka pang ka shitom.
Kum u MLA u la khot la wer ruh ïa ki paidbah ba kin dang ai ka jingïatrei lang ban wan shibun ki kam pynroi bad u khmih lynti ruh ba ka sorkar MDA ha ka jingïalam u Conrad K. Sangma kum u Myntri Rangbah ka jylla kan dang theh shuh shuh ïa ki kam pynroi na ka bynta ki paidbah ka Ri Bhoi bad ruh ka Jirang Constituency, u la bynrap.
