Shillong, Naiwieng, 28: U Myntri ka Sorkar Jylla uba peit ïa ka tnad Food Civil Supply and Consumer Affairs u Bah Comingone Ymbon ha ka sngi Baar u la bthah ïa u Commissioner & Secretary jong ka Food Civil Supply u Parvin Bakshi ban leit mih khmat ha ka jingïalang ka ban sa long ha Nongpoh, Ribhoi ban ïakren pynbeit halor ka jingbyrngem jong ka North East Petroleum Mazdoor Union ban sangeh noh ka jingpynpoi ïa ka umphniang petrol sha kane ka jylla halor ka jingkynnoh ba ki nongñiah trok kit umphniang ki la mad ïa ka jingshah pyndik ha ki bor Pulit ka Jylla Meghalaya.
“Mar ïa ïoh jingtip shaphang kane, nga hi lade nga la shimkhia ban telephone ïa ki ophisar bad nga la bthah ïa u Commissioner and Secretary ba un ïakren bad ki (Mazdoor Union). Ha ka jingshisha ngi la khot ïakren ban ïakren shane hynrei kim treh. Hadien kata, ngi la pynbeit ban pynlong ïa ka jingïalang ha Nongpoh lashai sngi ban khot lang ïa ka tnat Pulit, ïa ka Mazdoor Union, ki trai petrol pump. Ngin ym kwah ba ka jylla jong ngi kan mad ïa ka jingjynjar na ka jingkyrduh umphniang,” la ong u Bah Ymbon.
Haba kylli, u la ong, “ngam pat ïoh jingtip haduh mynta, hynrei nga dang shu ïohi tang lyngba ki lad pathai khubor. Na kata ka daw nga la shimkhia mar mar khnang ba ki paidbah kin ym jynjar. Katkum ka jingujor ba ki la thoh sha nga kum u Myntri Sorkar nga ïohi ba ka don jingkynnoh ba ki Pulit ki pyndik, ki leh tohmet bad ngam pat nud ban ong ba ka don shisha ka jingshah leh tohmet bad kan don shisha kata ka jingïohkam ïa kiba leh tuh. Ngam pat lah ban ong eiei. Namar haduh mynta hi, nga kyrpad ïa ka tnat Pulit.”
“Lada ngi lap ngin pynshitom ïa kiba donkti bad ngim kwah ba kane ka jingjia kan ktah tang ïa ki trai petrol pump hynrei kan ktah ruh wat ïa ka jinglum khajna jong ka Sorkar. Wat u trai petrol pump ruh u duhnong bha lada ka petrol ka jah 100 litar ha ka shi sngi,” u la ong.
“Ngim kwah shuh nangne shakhmat ba kan jia kumne,” u la bynrap.
