Kine kim pat dei ki sngi ba khatduh hynrei ki sngi ban kylla bamut thymmai

Bun ki ïa pyrta bad ki ong kine ki dei kita ki sngi ba khatduh ha kaba U Blei un sa pynkut noh ïa ka pyrthei, kine ki jingong ki jia tad ynda la wan ka jinglynshop ka khlam, ka jingher thma ki puit bad kiwei kiwei de ki jingjia ba phylla bad kiba jynjar ha sla khyndew baroh. Kumta ki ong kam slem shuh ka jingpynkut noh U Blei ïa ka pyrthei. Hynrei ki parabangeit bad ki nongpule baieit jong nga ngan ong ïa phi kine kim pat dei satia kita ki sngi khatduh kumba ki ïa ong hynrei ki dang dei tang ki Dak jong ki sngi ba khatduh bad ka jingwan ar sien u Khun u briew.
Ngi kynmaw haba ki Synran ki wan ha U Jisu jar jar ha u lum Olib bad ki kylli: Kaba kumno ka jingwan jong me bad ka jingwai noh ka pyrthei? Hynrei u Jisu u ïathuh ba kin wan ki nongshukor, ki thma kin sawa, ki nemsniew, ki jingïapthem, ki jingkhyn-ñiuh jumai, ki jingïaleh ka ïing ïa ka ïing, ka jingkordit kiba pun khun bad kine baroh ki dei ban long tangba kim pat dei satia kaba kut ka pyrthei hynrei ki dei tang ki dak ka jingsdang ka jingjynjar. (Math 24:3-8) u Apostol Paul u ong, ki sngi shwa ka jingwan u Trai ki long ki por ba shitom. Shitom ban pynsngewthuh, shitom ban pynbeit, shitom ban sneng, shitom ban batai.
Ka daw ka long ba ki briew ki ieit tang ïalade, ki ieit sbai, kren sarong kren khraw, ki bym don jingsngewnguh, ki bym kohnguh kmie kohnguh kpa, ki bym ïa map ki bym ieit ïa ka kynja, ki nongdie lok, hangamei ba runar ki bym ieit ïa kaba bha. (2 Timothy 3:1-3) bun kiei kiei ba ka ktien U Blei ka la kren shaphang ki dak shwa ba ka sngi khatduh kan wan jia long ïa kane ka sla pyrthei.
Kumta haba phai sha kine ki sngi ba ngi im mynta kim pat dwi kita ki sngi khadduh hynrei ki dei kita ki sngi jong ka jingkylla bamut khadduh jong ki briew ha sla pyrthei bad ka dang plie ka lad ba ngin kylla kaba mut thymmai noh na ka jingleh bymman jong ngi bad ban phai khmat ban pyndem rit ha ki jingduwai ha u Blei. U Blei um kwah ba kawei ka mynsiem kan jot noh ha shwa ba un pynjot ïa ka pyrthei kumta u plie lad ïa ngi ban kylla kaba mut.
Ka ktien U Blei ka ong: Hynrei to tip ba ka jingtud (Slem) jong u Trai Jisu ban wan pat sha ka pyrthei, dei ka jingap bad jingïaishah slem jong u ba ki briew kin ïoh ngeit, kin kylla bamut. “U Trai un leh tud shaphang ka jingkular kumba don kiba ñiew-ka jingleh tud: hynrei u ïai shah slem bad u bym da mon ïano ïano ruh ban jot noh hynrei ba kin ïa poi sha ka JINGKYLLA BAMUT” (2 Petros 3:9) bad ngi kynmaw ruh ïa ka nongbah ba khraw ka Ninebeh ha shwa ba U Blei un pynjot ïa ka u la phah ïa U Jonah ban leit ïathuh shaphang ka jingpynjot ba U Blei un theh ha ka bad ba kan kylla bamut noh ban lait na ka jingjot. (Jonah 1:2) bad U Jonah ruh haba u la lyndet na U Blei ban kyntait ïa ka jingkhot U Blei u Blei u la phah da ka jingpynshitom u la shah nguid ha u Dohkha haduh ba un da kylla kaba mut u Blei u sa pyllait na jingpynshitom. Bad ka Ninabeh ruh ka la kylla bamut. (Jonah 2 & 3) kumta kine ki sngi ba ngi im mynta ki dei kita ki sngi ba U Blei u ai ka lad ban kylla bamut katba ym pat pyndep lut ïa ki jingjïa shaphang ki dak jingwan u Trai kat kum ba la thoh ha ka ktien U Blei.
Lada ki sngi ba khatduh kin wan kin jia ka ktien u Blei ka ïathuh ïa ngi, kan long ka jingpyndum ïa ka sngi, u bnai un ym ai jingshai, ki khlur kin hap na bneng, bad hangta kan paw ka dak U Khun u briew ha bneng bad ka pyrthei kan ïa lynñiar lympat namar ba ki ïohi ïa u khun u briew ha ki lyoh bneng ha ka burom ba khraw bad u la phah ïa ki angel ban lum na ki saw lyer ïa ki ba la jied baroh ban rong noh ha kata ka sngi (Math 24:29-31).
Hadien ba la rong noh ïa ki riewkhuid yn khang khyrdep noh ïa ka lad ka jingkylla ba mut ïa uwei pa u wei u briew bad kaba sah hangta ka long, yn sa jam noh sha ka kitab Jingpynpaw bad hangta kin jia ki jingput turoi ïa ka pyrthei bad bun byllien ki jingpynkordit ïa ka pyrthei kumba la thoh ha kitab jingpynpaw 8:6 sa ka jingsynshar u Mrad khlaw ïa ka pyrthei baroh kawei. Jingpynpaw 13. Bad hadien kata yn theh noh ïa ka pliang ka jingbitar U Blei haba halor ka khyndew baroh. (jingpynpaw 16)
Kumta to ngin kylla kaba mut ngim dei ban buhteng ka por ka dang ap bad ka lad ka dang plie ban jan sha U Blei. Ngin phai noh na ki lynti bymman jong ngi bad ngi ïasnohkti lang ha kata kaba bha baroh da kaba kiar noh sngewtriem na ki kam ba thala.