Kilan met u CM da kaba ïaid kjat 2 kynta tam na ka lynti ba ïa khun ïa ka Thma Bah Ba Nyngkong ki Phareng

Shillong, Iaiong 7 : Mynta ka Lah Sngi U Blei 7 tarik Iaiong kaba dei ka shuti ha East Khasi Hills namar ka Shad Suk Mynsiem, U Myntri Rangbah ka jylla u Conrad K Sangma, ula poi ïaid kjat biang-ha kane ka kynti sha ka Rhododendron Riot Trek, ka jaka ïaid kjat bym ju kham ïapoi ki briew, kaba don ha Upper Shillong.
Tang khyndiat minit eh ban leit da ka kali na Shillong, kane ka jaka ïaid kjat (trek) ba 2.5 kynta ka tyrwa ïa ka mariang bad ka sawdong sawkun kaba ithiang, ka khana pateng ne histori bad ka jingring mynsiem ïa ka lyer khuid.
“Ka dei ka lynti ïaid kjat ba don ïa ka khana, ka dei ka lynti ïaid ba pyndonkam da ki nong Bilat ha ki snem bala leit noh” ula ong haba ïeng pynhiar mynsiem hapdeng jong ka lynti ïaid. “Ha kane ka lynti, phin ïohi ïa ki bunkers (thliew jaka rieh jong ki shipai) bala pyndonkam ha ka thma bah ba nyngkong (World War-I), kaba dang lah ban ïohi haduh mynta….ki don ruh ki kynroh bala trei naduh ka por jong ka Sorkar Bilat, kaba la trei janai bha” ula bynrap.
Ka Rhododendron Trek ka ïaid lyngba ki jaka jong ka Lum Shillong-Upper Shillong Forest Reserve, shibynta jong ka Shillong Rhododendron State Park, ka jaka kaba phuh da ki syntiew rong pink, saw bad purple ha ka por pyrem. Kane ka jaka ka dei ruh kaba riewspah bha ha ka jingdon ki jait jingthung jingtep bad ki jingthaw ba im bad ruh ka dei ka tyllong um ba kongsan bad kaba ai ka lyer khuid ïa ka Shillong.
“Ka dei ka jaka kaba kongsan bha” ong u Myntri Rangbah haba bynrap “Khamtam ba ka don hapdeng eh jong ka Sor. Nga kwah ban pynshlur ïa phi baroh-ki nongshongshnong ka Jylla bad kumjuh ruh ki nongwan shangkai-ba phin wan bad mad ïa kane ka lynti ïaid kjat. Phin sngewtynnad shibun eh”.
Kumta, ha kawei ka por haba phi sngew kwah ïaid kai sha ki jaka bym pat ju poi bad kwah ban mih na sor, leit kai sha ka Rhododendron Riot Trek ha Upper Shillong ban ïohi ïa ki jingjyrngam ki khlaw bad ban sma ïa ka jingiwbih ki syntiew Rhododendron.
Kane ka dei ka khubor ba jar jar kaba u Myntri Rangbah ka Jylla Conrad K Sangma u ïaleh ban pynphriang-kawei ka jingïaid kjat ha ka shisien ïaid.
Ha kine ki khyndiat snem bala leit, u Conrad Sangma ula kylla long suki suki u nongpyni nuksa ïa ka jingim kaba koit ba khiah bad kaba smat ba sting. La ka dei ka jingïaid kjat sha ka jaka trei kum ka jingsdang ïa ka “Fit India Movement” ha u 2019 lane ka jingleit ïaid kjat ryngkat bad ki Myntri Sorkar ha ka Cabinet Retreat ha Sohra, myn ha u bnai Kyllalyngkot mynta u snem lane ka jingïaid kjat sha JN Stadium ha Polo ban leit peitkai ïa ka phutbol ISL ha u Rymphang mynta u snem. Ula pyni ba u ïaleh ban kiar na kaba shong kali bad ban ïaid noh da ka kjat kat haba u ïoh lad. Kam dei shuh kaba phylla ba ula pyllait paidbah ïa ka “Meghalaya Trails App and Trekking Book” ha u Lber, 2024.