Nongstoiñ, Ïaiong 07: Ka jingshah shoh u Syiem ka Hima Nongmynsaw Syiemship ka la kynjoh haduh shiteng snem ei ei bad kat haduh kane ka khyllipmat, la ïoh jingtip ba ka tnad pulit ka la dep ban pynlong ïa ka jingtohkit kaba bniah bad kumba 95% la pyndep.
Kaba sah ka long satang katto katne tylli ki jingdonkam ban pyndep haba ïadei bad katei ka jingjia. Shen shen ka tnad kan sa leh ïa kaba donkam, ong u Bikram R. Marak Superintendent of Police ka West Khasi Hills District haba ïakren bad u nongthoh khubor.
Katba na ka liang u bah Donbok Snaitang Joint Secretary ka Hima Nongmynsaw Syiemship, ha ryngkat ka jingdonlang u Phlowel Syiem, Syiem ka Hima Nongmynsaw, bah Lestingdar Thongni bad kiwei kiwei ki riew pawkhmat ka hima, u la pynshai paidbah ïa ki katto katne ki kam leh pyrshah kyndon hima da u bah Passtar Nongshlong, u ba la ju long teng kum u sordar shnong ka Mawïamsyiem.
U bah Snaitang haba ïakren bad u nongthoh khubor ha ka sngi saitjaiñ, u la kynnoh ba u bah Passtar Nongshlong u dei u ba ju pynkheiñ ïa kiba bun ki kyndon ka hima, ha kaba u la ju leh marwei ïa shibun ki kam. Nalor kata u la ju shim pisa ha man la ki kam.
Ym tang katta hynrei haba ka hima ka khot ban ïakren um ju patiaw, pynban u ju ïaleh pyrshah. Kumta ka hima haba ka la bishar bniah ka la hap ban weng noh ïa u bah Passtar na ka jinglong sordar, namar la ïoh ruh shibun ki jingujor na ki paid nongshong shnong.
Lah ban kdew hangne ba u Bah Passtar Nongshlong u dei uwei na kiba hakhmat eh ban ïalam ha ka kam ktah kti ïa u Syiem ka Hima Nongmynsaw Syiemship ryngkat bad ki paralok jong u ha ka jingjia kaba la jia naduh u snem 2024.
