Shillong, K’Lyngkot 03 : Ka Meghalaya ka la ïoh pdiang ïa ka khusnam ba lai ha ka ODOP Awards 2023 kaba la pynlong da ka Department for Promotion of Industry and Internal Trade ha Pragati Maidan, New Delhi.
Kane ka khusnam ka long kum ka dak ka jingithuh ïa ka jingtrei borbah jong ka jylla ban kyntiew ïa ka thong ban pynmih kawei ka jait mar na kawei ka distrik lane ‘One District One Product (ODOP) Initiative’.
Ïa kane ka jingai khusnam Aatmanirbhar Bharat Utsav bad National ODOP Awards la wan ban plie da u Dr. S Jaishankar, Myntri ka tnad External Affairs jong ka sorkar pdeng.
Ka jingthmu jong katei ka khusnam ka long kum ka dak ban ai ka jingpynshlur bad ka jingithuh ïa ki jylla, UT bad ki district kumjuh ki Indian Mission ban pynseisoh ïa ka thong jong ka Aatmanirbhar Bharat lyngba ka ODOP.
Na ka liang u Myntri Rangbah ka jylla haba kren halor katei ka khusnam u la ong, “Ka long ka jingai mynsiem ïa ki nongrep jongngi bad khamtam ïa kito ki nongtrei kti ba tbit kiba la pyrshang borbah ban pynwandur ïa ki mar ki mata jong ki ym tang ha ki lympungbah jong ka Ri hynrei wat ha ki rynsan jong ka pyrthei baroh kawei. Ka jingjop jongngi ban ïoh ïa ka khusnam ODOP ïa ka jingtreikam kaba sani bha la ka long naduh ka rukom pynïaid iew nangta ka shap Geographic Indication (GI) bad kiwei kiwei.”
U ong ruh ba ka sorkar Meghalaya ka pynpaw ka jingsngewnguh ïa ka Department for Promotion of Industry and Internal Trade bad ruh ïa ka Ministry of Commerce kaba la ïohi bad ai ka jingithuh ïa ka jingpyrshang borbah jong ka jylla.
Ïa kane ka khusnam la leit ban shimti da u Commissioner and Secretary ka tnad, u Dr. Vijay Kumar D ha kyrteng jong ka sorkar Meghalaya.
Utei u heh sorkar u la ong ruh ba katei ka jingithuh ba ka sorkar pdeng ka ai kadei na ka bynta ka jingtrei shitom jong ki paidbah nong Meghalaya kiba la lah ban pyni sha ka pyrthei ïa ka jingdon ki mar kiba pawnam.
U ong ruh ba ka long ka burom kaba khraw ba ka jylla kan ïoh ïa ka jingithuh ha ka thup jong ki lai tylli ki jylla kiba hakhmat eh ha ka Ri ha katei ka thup haduh ban da ïoh pdiang ïa ka khusnam ODOP Awards.
Lah ruh ban kdew hangne ba ka Meghalaya dang shen ka la khaii shaduh Dubai ïa u sohñiamtra uba ka pyrthei baroh kawei ka tip ïa ka jingthiang jong une u jait soh ba mih na ki them riwar jong ka jylla.
