Kiba riewspah ki nang riewspah, kiba duk ki nang sdot ha ka jingsynshar ka MDA, ong u Bah Pala

Shillong, Naiwieng 20 : U Bah Vincent H Pala, President ka Meghalaya Pradesh Congress Committee u la ong ba ka long ka man ka synshar khadar ka Jylla ha ka jingsynshar ka Sorkar MDA ka pyni ïa ka jingïajngai hapdeng kiba duk bad kiba riewspah ha kaba kiba riewspah ki nang riewspah bad kiba duk ki nang sdot shuh shuh.
Kane ka phang jingkren u Bah Pala ka la long ha ka jingïalang plie ïa ka ophis treikam ki samla ka seng Congress na Mylliem Constituency lane ka Mylliem Assembly Youth Congress (MAYC) ha ka janmiet 19 tarik u Naiwieng, 2022 ha Mylliem Madan Iing Syiem.
U Bah Vincent u la ong ba ka Congress ha kane ka elekshon ban wan ka la pynkhreh da ki briew kiba shemphang, kiba dang samla ka rta bad kiba biang bha ka kyrdan pule. U la ong ba ka Party kan pynieng kyrtong ruh da ki longkmie kiba la don 6 ngut eiei kiba la pan ticket.
Da kaba pynpaw ba ka Congress kan jop na kylleng ki Constituency na ki District bapher bapher ka Jylla, u la ong ,”Ka Party kam kwah ban pynpaw shabar ïa ka bor namar kin don kiba pyrshang thied ïa ki nongïalam bad don pat ki nongïalam kiba la shah thied ha kiwei ki party ki la kwah ban wan phai biang namar kim lah ban ïa treikam kumba ki long mynba ki dang don bad ka Party”.
Une u nongïalam ka Congress uba dei ruh u dkhot sha ka Iing Dorbar Thawain Lok Sabha na Shillong u la pynpaw ruh ïa ka jingsngewkhia namar ka jinghiar ka pule puthi ha kine ki san snem bad kumjuh ka jingbym biang ki skul pule.
“Ka Sorkar Jylla ba mynta ka plie ïa ki mawnongrim ban shna CHC, PHC bad ki hospital khlem ki ‘Notification’ bad khlem don jingmang ban thung kam, ki tiar ki tar”, u la ong ryngkat ka jingkynthoh ruh halor ka jingplie mawnongrim kaba ar sien ïa ka Block ha Lumshnong, East Jaiñtia Hills District.
Da kaba pynpaw ba ka biang ban wanrah ïa ki kam pynroi kum ki Block ki Sub Division ban jan sha u paidbah, u la ong ban shu pynbieit pat ïa ki paidbah ban shu plie mawnongrim shwa ka elekshon kam ïahap bad bun ki MLA kin rem.
Halor kane ka ophis ki samla ka Congress na Mylliem, u la ong ba un ai jingïarap pisa ban pynbiang ïa ki jingdonkam bad khmih lynti ba kane ka ophis kan long pat ka jingmyntoi ym tang ïa kiba na Mylliem Constituency hynrei ïa ki Constituency ba marjan.
Na ka liang U MDC ka Congress, Bah Ronnie V Lyngdoh u ban ïa aireng ha ka elekshon jied nongmihkhmat sha ka Iing Dorbar Thawain ka Jylla Meghalaya na Mylliem Constituency u la ong ba ha kane ka Sorkar Meghalaya Democratic Alliance ba mynta ka synshar paidbah ka long beit tang na ka bynta ki heh spah.
Ha shwa ban poi sha katei ka phang jingïakren, u ne u MLA barim ka Mylliem u la ong ba ki samla lyngba ka Mylliem Assembly Youth Congress kan dei ka rynsan ka ban ïa mir jingmut ban ïa sngewthuh bha ïa ka saiñ-hima khnang.
“Namar ka jingjur ka bam sap ha kane ka Sorkar ba mynta ki nonghikai, ki doctor kim ïoh tulop shuh”, u la ong da kaba pyni nia pyrshah halor ki khubor jingkynnoh ba ka seng Congress ka la hiar da kaba jubab ba kat nang mih ki sngi ka nang kiew nang khlaiñ.
U la ong ba ka Congress ka wanrah ïa ka jingïatylli wat hapdeng ka jingïapher ka jingngeit, ka ktien ka thylliej, ka riti dustur bad kiwei pat bad ïa mynta ki paidbah ha ka Ri India ki la kyntait ïa ka BJP.
Ha kane ka jingïalang la ïa donlang da u Bah Adrian L Chyne, President MPYC, u Bah Batskhem Ryntathiang, MDC na Mairang, kiba la ai ïa ki jingkren jong ki lem ki nongkitkam ka Mylliem BCC bad MAYC ryngkat ki nongïalam shnong lem ki nongkyrshan ka Congress na Mylliem.