Nongpoh, Risaw, 15: Shibynta ka thong jong ka National Tobacco Control Program (NTCP), ka CHC Bhoirymbong ha ka jingïatreilang bad ka kynhun Young Minds na Ri Bhoi, mynta ka sngi ki la pynlong ka jingïalang ba kyrpang ban pynshai halor ka jingktah jong ka jingdih duma ha ki samla bad ki paidbah.
Ha kane ka prokram, la wan shim bynta da ki khynnah skul, ki nongshong shnong ka thaiñ Bhoirymbong, ki Doctor, ki Nurse, bad ki nongtrei ka koit ka khiah na CHC Bhoirymbong, ryngkat ki dkhot ka kynhun Young Minds.
Ka Dr. N.B Mawrie, kaba dei ka senior Dental Surgeon ha CHC Bhoirymbong, ka la ai jinghikai kaba bñiah halor ka jingma jong ka jingdih duma bad kumno ka ktah ïa ka koit ka khiah, kaba lah ban wanrah bun ki jingpang kum ka bampong bad ka jingbym lah ban ring mynsiem.
Ka la ban jur ruh ïa ki samla ba kin long kiba peitngor ban ym sdang dih duma namar ka jingshah kyrni ha u ka long kaba eh ban pynlait, kaba lah ban pynlong ïa u briew ba un mad ïa bun ki jingeh ha ka koit ka khiah.
Nalor kata, ha kane ka prokram, la sam ruh ki kot pynshai sha ki khynnah bad ki paidbah ban pynsngew-thuh shai halor ka jingïa-khun pyrshah ïa ka jingdih duma hapoh ka National Tobacco Control Program.
