Bunsien tang shu la poi ka election bad tang shu la ïeng na rynsan ki nongïalam ki klet noh ïa ka jinglong nongïalam jongki namar haba ki kren teng teng la sngewthait, sngewlehrai bad sngew kum ban phet noh wat na ki jingialang ruh namar ki sei ïa ki kyntien bad ki nia kiba tad dor, kiba ym don dor ban kren na ki rynsan ïalap election. Teng teng ki don ki khep ba ki nongïalap election ki kren wat ïa ka kam shimet jong u ne ka briew ruh.
Kynmaw haba ïeng na rynsan kum ki nongïalam, ka dei ka ktien ka thyllied kaba kor tam. Lada kum ki nongïalam ki kren da thew, da ka akor ka burom, ka main nongïalam jongki ruh ka paw hynrei lada ki kren kum ki riew madan kum ki khynnah kynjat sla ne shong thad lad, ka jinglong jongki ruh ka paw kumta hi.
Hooid ïa ki jingshisha dei ban kren, ban sei madan bad ban pynshai sha ki paidbah la ka dei ïa ki kam bamsap, ne ki kam pyndonkam bakla ïa ka pisa paidbah, hynrei kynmaw lada long kumno kumno ruh dei ban kiar na ka kam thad madan ïa ka long ïing longsem jong uno uno ne kano kano ka briew ne kyrtong na rynsan ïalap election. Nalor kata kam bha ruh ban shu bei shu khoh ïano ïano haba kren ne ïalap election.
Ka Jaidbynriew Khasi ka dei ka Jaidbynriew kaba tip briew tip blei bad ka dei ka Jaidbynriew kaba ïoh ïa ka nam ïa kata ka Akor ba bha tam ha pyrthei. Kumta to ngin ïa kynmaw ban ïai ri kyndong ïa kine kiei kiei baroh ym tang ban shu kren shongshit ha ka por election ne ban shu kren tam naphang ïano ïano hynrei dei ban ïa burom mar kylliang. Haba ïalap election kam mut ban ïathad madan hynrei ban pynshai halor ki nongrim jong ka party, jong u kyrtong bad ter ter. Hooid ym lah ban lait bunsien ka party kaba ïalam ïa ka jingsynshar bunsien hi kan shah ther beit ha ka election hynrei kane ka dei kaba ju ïai jia hi ym tang ha ka jylla hynrei ha ka ri bad wat ha ka pyrthei hi ruh.
Kum ban shu pynkynmaw ha ka election ha u 2018 shwa ka election ka jingshah kynnoh bamsap ka sorkar MUA ba la ïalam da ka Congress bad u Dr Mukul Sangma kum u myntri rangbah ka la long kaba ym lah shuh wat tang ban sngap ruh la sngew ba ka Congress kan ym khyllie ne khie khlieh shuh ha katei ka election hynrei ynda la kut ka election ka jop bun pynban ka Congress da kaba ka la jop haduh 23 ngut ki MLA.
Kumjuh ruh ha kane ka kynti ka long biang kumjuh, kata ka I-PAC jongka TMC kaba la wan sha kane ka jylla dang shen ka la pyrshang ban sei na kyndon kynshrot ban kynnoh bamsap ïa kane ka sorkar. Nalor kata kane ka sorkar ka la shah kynnoh bamsap khamtam ha kaba ïadei bad ka kam khaïi dewiong, smart meter bad ter ter. Kumba long la sngew ba ki paidbah kin ym jied shuh ïa ka NPP ban wanphai ha ka bor hynrei khlem pep kan jia biang kumjuh kata ka mut ynda la dep thep vote bad niew vote ka ban jop bun dei ka NPP hi namar kumba long hi mynta ka lyer ka beh hi sha kane ka party ha kylleng ki constituency.
Kumta khnang ban lait na ka jingïa sah sniew kaba kongsan ka long kren ïa kaba dei bad halor ki jingshisha kyiar na kaba kynnoh khlem nongrim bad kiba ïalam bakla khnang ba ka jingïadei bad ïajuh ïajan kan ïai neh shi rta.
