Ym lah ban len ba ki tamasa lehkmen ne ki youth week ba ju pynlong ha man la ki shnong ki thaw ki long ki rynsan kiba lah ban sei ïa ki sap ki phong jong ki samla ka shnong kiba lehse kim pat ju mad ïa ka rynsan kaba shabar na jylli jong ka shnong. Ka jingdon kine ki tamasa lehkmen ka ïarap ruh ïa ki khynnah samla bad ki nongshnong ban don ka jingïatylli bad ka jingithuh ithaw ha ka shnong ka thaw bad khlempep kan wanrah ruh ka jingïajan kaba bha ha ka imlang ka sahlang.
Ka shnong ka thaw kaba pynlong ïa kum kine ki tamasa khlempep kan iohi ïa u soh uba ki samla ki trei shitom ban iohkheit ïa ka nam jingjop ha ka jingim jong ki, bad dei lyngba kine ki rynsan wat kito ki samla kiba bunkam ban pynleit jingmut baroh shisnem ban minot ha ki jingpule jong ki, ki iohlad ban pyni ïa ki sap ki phong jong ki da kaba ïashim bynta lang ha ki jingïakop bapher bapher.
Ka jingpynkup burom jong ka shnong ka thaw ne ka Seng Samla ne kano kano ka kynhun kaba pynlong ïa kine ki tamasa ka ïarap ïa ki samla ban nang trei shitom shuh shuh ban kham leh bha ha ki por ki ban dang wan. Kum kine ki lympung ne ki tamasa ki long kiba donkam haduh katta katta, namar la iohi ba ym tang kiba la samla bad kiba la heh la san ki iohlad ban sei ïa ka sap ka phong jong ki, hynrei wat ki hep barit kynthei bad shynrang ki iohlad ban sei ïa ki sap ki phong jong ki bad pyni sha ka pyrthei ba ma ki, ruh ki lah ban ïashim bynta ha kine ki tamasa hapdeng ka kyrta bad ka kyrdan jong ki.
Bunsien la ju iohi ba bun na ki samla kiba paw bha ha ki rynsan ïalehkai, ha ki rynsan ka rwai ka siaw, ka ïakop khyrwait syngkai ha rynsan bad kiwei kiwei, dei ba ki iohlad ban sei ïa ki sap ki phong jong ki ba ki ju ioh ban ïashim bynta manla u snem ha ki bnai tlang haba ka shnong ka thaw ne kino kino ki kynhun seng ki ju pynlong ïa kum kine ki tamasa ha ki shnong ha thaw.
Ym lah ban len ba kin don beit ki briew kiba ju sngew khohñioh ïa kine ki tamasa lehkmen, kiba ju kren diaw ba ki long tang ki kam sngewbha bad ki kamkai pynlut pisa. Shiban lada pyrkhat kan long hi kumta, hynrei ha lyndet jong kane, u don hi u soh uba pynmih ïa ki rangkynsai bad ki thei kynsai ki kylla long ki khlur kiba wanrah ïa ka nam ka burom ym tang ïa ka ing ka sem bad ïalade shimet hynrei wat ïa ka ri bad ka jaidbynriew hi baroh kawei.
Bunsien hi yn lap ba ki samla ki kylla ngop noh sha ki jingsniew lada ym don kum kine kiei kiei ki jingpynbyrngia kiba tei ïa ka lawei ka jingim jong ki. Yn lap ïa ki bunsien ki kylla kamkai noh namar ym don satia ba plie lynti ïa ki ban sei ïa ki sap ki phong ba ki don, hynrei lada don mano mano ba plie ïa ka lynti khlem pep kin lah ban trei shitom da kaba don ka mynsiem ïakhun namar bunsien haba la ïashim bynta ha ka jingïaleh, ka jingskuiñ ka mynsiem iakhun ka don beit ban jop ïa ka thong.
La ju iohi ba bun ki samla ki poi sha ki rynsan ïakop bapher bapher dei lyngba ki rynsan ba ki mih ban aireng bad ïakhun ha ki lympung ba la ju pynlong ha ki shong ki thaw bad dei kine ki rynsan kiba rit kiba ai mynsiem ïa ki ban kiew suki pa suki na ka por sha ka por khlem da pynlehnoh ei ïa la ka sap ka phong kaba ki don.
Shirukom la dei ban ai jingïaroh ïa kito ki nongpyniaid kiba la pynlong ïa ki rynsan ïakop rwai, shad, ialehkai bad kiwei kiwei, namar ban shu phohsniew ban leit rung beit beit sha ki lympung kiba heh ka long kaba ym lah satia ban pdiang bad ka bym lah long hi ruh lano lano.
Ka jingdon ki kynhun bapher bapher ban plie lynti ïa ki samla ha kane ka juk ka long kum ka kabu kaba biang tam ïa ki samla kiba don la ki sap ki phong ban ïabeh lem sha kane ka juk kaba ka pateng ba ladep kam ioh mad. Ha kawei ka liang ka sorkar ka la dei ban ai ka jingithuh ia kum kito ki kynhun kiba don ia ka bynta kaba khraw khlem da khmih lynti na ki tnad sorkar ha kaban pynlong ia kum kitei ki tamasa kiban kyntiew ia ka sap ka phong jong ki samla bad khamtam eh ban pyllait ruh ia ki ba kin sakma sha kiwei pat ki jingpynbyrngia kiba ap kmang ban tan.
La ju iohi ruh ba jan man la ki shnong ki don beit tang ia ki kynhun kiba peit tang ia ki kam ialehkai la ka long ha ka phutbol, basketball, kriket, ki volleyball bad kiwei kiwei hynrei ym ju kham don pat ki kynhun kiban peit ia ka sap ba kham pher jong ki khynnah kum ha ki rynsan iatai nia, iakob dro, ki lympung iakob rwai bad khamtam eh ia ki lympung iakob shad bad mynta lei lei sa ka iakob pyni riam. Malu mala lada shu khein antad tang kumba 15 persen ei ei na ki nongshong shnong ne ki khun samla ka shnong kiba da pynlut por bad ieit shisha ban pynleit jingmut shisha ha ki jingialehkai da ka bor kum ka phutbol bad ka kriket ne basketball hynrei kiba bun hi ki dei beit ha kiwei pat ki jingialehkai.
Kumta, lada jia ba ki nongmihkhmat paidbah lane na ka liang ki bor distrik ne lyngba ka C&RD Block ki lah ban mang pisa na ka bynta kine ki shnong khlem pep ki samla kin pynlut noh ia ka por jong ki ha ki kam ialehkai ha shnong ha thaw ha ka jaka ba kin leit shang kai bad ngop pat ha ki shangkhawiah kiba harukom khamtam ha u drok uba la ap beit kmang lano ki khun samla kin wan ban ur ban hap ha ktem jong u. Lada ka sorkar ka kloi ban pynlut na ka bynta ka jingiakhun pyrshah ia u drok ka dei ruh ban kloi ruh kumno ban iada lypa pat ia u. Dei ban aibor ha ki nongialam shnong ne ki nongialam jong ki seng samla ba kin pynkhlain ia ki prokram ha ki shnong ki thaw la kumno kumno shisien ha ka lai bnai, kata da kaba ai lad ba ha ki shiteng snem kin pynlong ia ki jingialehkai hapoh iing ne Indoor Games) katba ha ki bnai Tlang ynda la kut lut ki eksam bapher bapher kin sa pynlong pat ia ki prokram ha madan.
Da kaba leh kumne la kumno kumno kan don beit ka jingkylla ha ki shnong ki thaw namar khlempep ki kmie ki kpa kin kmen ban iohi ba ki khun kin mih na la iing ban leit shim bynta ha kine ki lympung bad kan long ruh kumshi bynta ban wanrah ka jingia ithuh ithaw bad ka jingiadei paralok ha shnong ha thaw.
