Nongpoh, K’Lyngkot 02: Ka Ri-Bhoi District Sports Association (RBDSA) kaba dei ka kynhun kaba ju don ka jingangnud ban kyntiew ïaka kam ïalehkai sports haka district, bad kaba la seng bad ai ka jingshakri naduh u snem 1974, haka sngi ba ar ka 31 tarik Nohprah kala sdang ïaka jingrakhe ïaka jingdap 50 snem ka jingïaid lynti jong ka RBDSA.
Kum ka dak ka jingsdang ïaka jingrakhe ïaka jingdap 50 snem ne ka Jubili Ksiar, naka liang ki nongïalam ka RBDSA hapoh ka jingïalam u Bah RB Shadap kum u President kala ioh ruh ban pynkiew ïaka lama jong ka RBDSA ha madan ïalehkai ka shnong Umdihar kaba dei ruh ka sngi pynkut bad pynhap pyrda noh ïaka lympung ïalehkai Ri-Bhoi Super League.
Ïa katei ka lama jong ka RBDSA ban rakhe ïaka Jubili Ksiar la wan ban kyntiew da u Dr DD lapang Myntri Rangbah barim ka jylla u ba dei ruh uwei naki nongseng jong ka RBDSA, haka jingdon lang u MLA ka Nongpoh Bah Mayralborn Syiem, MLA la Mawhati Bah Charles Marngar, Bah Hamlet Dohling President MFA, Bah RB Shadap President RBDSA, Rangkynsai Makdoh Senior Adviser RBDSA, Bah D Ryntathiang Secretary RBDSA, ki nongïalam seng bhalang bad kiwei kiwei ki riew rangbah.
Ha katei ka juh ka sngi naka liang ka RBDSA kala pynhap pyrda syndon ïaka phainal jong ka lympung ïalehkai Ri-Bhoi Super League hapdeng ka kynhun ïalehkai jong ka Umdihar pyrshah ïaka Kynjoiñ Umran.
Ha katei ka jing ïaknieh ïaka nam jop jong ka Ri-Bhoi Supper League ki rang-ïalehkai jong kitei ki ar kynhun kila sei borbah ïala ka jong ka sap bad pyneh beit triang ban ioh pynkhih jar nyngkong, hynrei namar ka jingtriem jong ki rang ïalehkai jong kitei ki ar kynhun ka la pynlong ba kin ïa khait khlem da don ba thep kol haduh ban da kut kapor naduh ba sdang ka kylla step haduh ba kut ka kylla miet.
Wat hadien ba naka liang ki referee ki la ai ïa ka extra time hynrei kitei ki 2 kynhun kila ïa khaid biang wat hadien ka extra time kumta ki bor pynïaid bad ki referee kila rai ban pynlong noh da ka jingïashut tie-breaker ba ka Kynjoiñ Umran kala lah ban pynliem noh ïaka Umdihar da 3-1 kol ban rah syndon ïaka nam lahduh jong katei ka lympung.
Naka liang ka RBDSA ka la sam ruh ïaki khusnam sha kitei ki kynhun kiba poi sha ka phainal bad kumjuh ruh ïaki khusnam shimet ha kaba ka Kynjoiñ Umran kum ka lahduh ka la ïoh ban rah ïaka song pisa kaba 80 hajar tyngka ryngkat ka trophy bad ka Kynhun Umdihar kaba wan ba ar ka la ioh ban rah ïaka song pisa kaba 40 hajar tyngka ryngkat ka trophy.
