Shillong, Kyllalyngkot 02: Ka Diligent Guys ka la ïoh ban rah ïa ka nam lahduh jong ka ‘8th Uplifter Open to All Tennis Ball Cricket League 2024’ kaba la long ha madan Nongthymmai hadien ba ka la pynliem noh ïa ka Red Hawks ha ka jingïakhun phainal.
Haba phai sha ka jingïalehkai, ka Diligent Guys ka la rai ban tied nyngkong hadien ba jop ïa ka jingkynting (toss), ha kaba ki la lah ban kamai 112 ron bad khyllem 7 wiket naka 10 obar ba la mang.
Napdeng ki nongtied, u Vinod Rai u la long u ba seisoh tam da kaba tied 43 ron, nangta u Basant Chettri u la kamai 32 ron. U Kishan Jaiswal bad u Sanjay Biswa jong ka Red Hawks ki la ïoh ban pynkhyllem mar 2 wiket ha ka bol.
Haba pyrshang beh ïa katei ka ron ba la buh, ka Red Hawks kam shym la lah ban pynurlong ïa ka thong namar ba ka la shah pynhap wiket u wei hadien u wei pat jan man ki obar. U Kishan u la kamai 15 ron bad u Markus Bhujel u la neh ha kaba kut da kaba kamai 29 ron, ha kaba ka kynhun ka la shah khanglad noh tang hapoh 85 ron.
U Keshav u la long u nongkawang bol ba shyrkhei tam ha kane ka jingïalehkai ha kaba u la ïoh ban khur 4 tylli ki wiket, kaba la ïarap shibun ïa ka Diligent Guys ban pynliem ïa ka Red Hawks da 27 ron bad rah syndon ïa ka nam lahduh.
Da kane ka namjop ka Diligent Guys ka la ïohpdiang ïa ka song khusnam kaba T-15000 ryngkat ka trophy, katba ka Red Hawks – kaba wan kyrdan ba ar (Runner-up) ha kane ka League ka la ïoh pdiang ïa ka song khusnam kaba T-7000 ryngkat ka Trophy.
Nalor ki khusnam sha ki kynhun la ïoh ruh ban sam ïa ki khusnam shimet sha ki rangïalehkai ba kynsai, ha kaba ïa ka nam ‘Man of the Final’ la khur da u Vinod Rai jong ka Diligent Guys, ïa ka nam rangkawangbol ba khur wiket bun tam (Highest Wicket Taker) la khur da u Keshav of Diligent Guys, u ba la pynhap 14 wiket naduh ba sdang ka lympung.
U Vinod Rai jong ka Diligent Guys u la ïoh ïa ka nam rangïalehkai ba kamai bun ron tam (Highest Run Getter) da kaba tied 108 ron. ïa ka nam ‘Man of the Series’ la ïoh da u Markus Bhujel jong ka Red Hawks u ba la kamai 67 ron bad khur 6 wiket.
Na ka liang jong ka League Organising Committee ka ai khublei ïa baroh ki kynhun kiba la ïashim bynta bad pynlong ïa kane ka League kaba jop ïa kaba la pynlong biang hadien 18 snem naduh u snem 2008. Khadduh khadwai, ka jingai khublei kaba khraw ïa baroh ki dkhot jong ka League Organising Committee kiba la don ryngkat naduh ka sngi kaba nyngkong haduh ka sngi kaba khatduh.
