Ki shipai ki dei ban siat beit ïa ki nong Bangladesh lada wan beaiñ sha India, ong u Bah Sanbor

Shillong, Nailar 07 : Mynta ka sngi u Bah Sanbor Shullai uba dei uwei na ki Nongïalam ka Bharatiya Janata Party (BJP) bad MLA ka South Shillong, ula ong ba ki shipai BSF ki dei ban siat beit ïa ki nong Bangladesh lada ki wan rung be-aiñ shapoh u pud u sam ka India.
U bah Sanbor uba dei ruh u Chairman ka Meghalaya Tourism Development Corporation (MTDC) ula pynpaw ïa kane haba ïakren bad ki lad pathai khubor, ha ka jingleit jngoh ïa ki paidbah ha khappud ka Meghalaya-Bangladesh ha ka thaiñ Dawki-Tamabil bad Pyrdiwah.
U bah Sanbor ula leit sha khappud ban peitthuh ïa ka jinglong jingman ha ki shnong khappud namar ka jingthut ka suk ka saiñ bad jingkulmar ba jur ha Bangladesh kaba la poi shaduh u pud ba ka Sheikh Hasina ban ïehnoh ïa ka kam Myntri Rangbah Duh ka Ri bad ban wan phet rieh sha India.
“Ka jingwan jngoh jong nga ïa ka thaiñ khappud khamtam ha Pyrdiwah ka long eh halor ka nongrim ba ngam kwah ba kan mih biang ka jingjia kumba jia ha u snem 2001. Ki shipai Bangladesh kila hiar thma bad kurup ïa kane ka shnong” ula ong.
U Bah Sanbor ula ïakynduh ïa ki nongshong shnong bad bor synshar shnong ka Pyrdiwah bad ruh ïa ki Heh shipai BSF kiba pahara ha ka thaiñ, ban twad jingmut ïa kiei ki jingpynkhreh ba ki shipai kila shim ha ka ban ai jingïada bad pynthikna ïa ka jingshngaiñ jong ki nongshong shnong ha khappud.
Ki Heh shipai BSF kila pyntip ba ka Sorkar India ka la pynkhlaiñ bha ïa ki bor pahara ha khappud ka Jylla Meghalaya bad kala dep phah ruh ïa ka kynhun ki shipai Bihar Regiment ban ïarap ïa ki BSF ha ka jingïaid pahara.
Maw ia wan phai na khappud u bah Sanbor ula leit ïakynduh ïa u Lat ka jylla u CH Vijayshankar ban pyntip halor ka jinglong jingman ha ki thaiñ khappud ka jylla Meghalaya bad ka ri Bangladesh.
“Nga la wan beit beit na khappud ban leit ai ïa ka kaiphod sha u Lat ka jylla ba haduh mynta ki paidbah ki shongsuk shongsaiñ hynrei ym lah pat ban tip ïa kaei ka ban jia pat lashai lashi sngi. Kala don ka jingpynbeit ruh na ka liang u Lat ka jylla kum u nongkit tien syiem ka ri un shimkhia ban ïakren bad ki bor ba halor ” ong u Bah Sanbor hadien ka jingwan ïakynduh ïa u Lat ka jylla.
Ula ong, ba ka Sorkar Jylla bad na ka liang ka sorkar ha Delhi ruh, naduh ki BSF haduh ki shipai kila long kiba la pynkhreh ban ïakhun pyrshah ïa ki briew kiba leh klumar.
U Bah Sanbor ula ong, “Na ka liang u Lat ka jylla ula ai ka jingpynthikna ba mynta hi wut wut un lum ïa ka jingïalang bad ki heh ophisar ba kin rah ïa ka khubor ba kin pynkhreh ïa ka jingpahara ïoh don kano kano ka jingwan tur jubor ne rung beaiñ ki briew sha Meghalaya. Ngi lah ïakren ba ngi ruh ngi dei ban pyndonkam da ka bor kat kum ki aiñ ki kanun bad lada donkam ban hiar da ka thma ne ban siat ïa ki ruh”