Khot hajir ka ïingbishar HC ïa ki bor shnong Mawsynram ba kyntait ai NOC ïa ki Hindu

Shillong, Nailar 07 : Ka ïing bishar High Court (HC) jong ka jylla mynta ka sngi Balang, ka la phah notice sha ki bor synshar shnong ka shnong Mawsynram ha kaba ïadei bad ka jingkyntait ai No-Objection-Certificate (NoC) ban pynlong ïa ka jingïaid pilkrim ki paid Hindu sha ka krem Mawjymbuiñ ha Mawsynram, East Khasi Hills District.
Ka ïing bishar ka la bthah ruh ïa ka Deputy Commissioner (DC) ka East Khasi Hills ban pynkhamti ha uwei u Ophisar ba don jingkitkhlieh, ban pyntip sha ki nongshah mudui ne ki bor synshar shnong Mawsynram ba kin wan hajir lashai ka sngi hakhmat ka ïing bishar.
Haba shong bishar ïa ka mukotduma bala ujor da ka Yatra, u Justice HS Thangkhiew ha ka hukum ula ong “Phah notice sha ki nongshah mudui No, 6,7, bad 8”.
“Kat kum ka jingïohi jong ka ïing bishar, namar kane ka kam ka dei kaba hap phikir bha bad ba donkam ban shim rai kyrkieh bad khnang ban pynbeit noh ïa ka kam, ka Deputy Commissioner (DC) ka EKH ka dei ban phah ïa u Ophisar ban pyntip sha ki nongshah mudui No 6,7,8 ba kin don hakhmat ka ïing bishar lashai ka sngi, ha ryngkat ka Deputy Commissioner bad u Superintendent of Police ka East Khasi Hills ha ka por 2 baje janmiet” ula ong.
Ka Yatra ka dei ka Society bala register, kala mudui da ka mukotduma pyrshah ïa ka jingbym ai NoC da ki nongshah mudui No 6,7,8 ban pynlong ïa ka jingïaid pilkrim sha krem Mawjymbuiñ kaba don ha Mawsynram, kaba dei ka jaka ba ju lehniam da ki Hindu.
U S. Jindal, u nongïasaid aiñ jong ka Yatra ula ong ba kane ka jingïaid pilkrim ka dei kaba ju pynlong manla u snem bad naduh u snem 2011, da ka jingthaw ïa ka Society, la nang kham pynjanai bad pynbeit ryntih ïa kane ka jingïaid pilkrim.
Une u Nongïasaid aiñ ula pyntip sha ka ïing bishar halor ka jingai NoC naduh u snem 2011 da ki bor District tad haduh u snem 2023 bad pyntip ba ka Dorbar Shnong la jan baroh kine ki snem, ka ju ai beit ïa ka NoC bad ki jingbit bad kat ki kyndon ba la buh, la ju bud thik pa thik da ki nongpynïaid ïa kane ka jingleh niam.
Ula pyntip ba ha une u snem, watla ïa ka jingai jingbit la dep ban ïoh ha ka 27 tarik Jylliew, 2024 na ki bor District ha ryngkat ki kyndon ba ki nongpynïaid ki dei ban ïoh NoC naka Dorbar Shnong Mawsynram. Hynrei haba leit pan NoC na ka Dorbar Shnong, kam shym la don satia ka jubab bad la ïoh jingtip pynban lyngba ki lad pathai khubor ba kala kyntait ban ai NoC.
U Jindal ula pyntip ba ki riewngeit Hindu kim don satia ïa ka jingmut ban pynlong jaka mane Blei ïa kane ka jaka kumba la mih kot khubor bad ha baroh kine ki snem, ka kam ba ki leh ka long beit tang ka jingsynreit um ha u maw lingam bad kam don satia ka jingthmu ban ktah ïa ka jingsngew jongno re jongno ne pynthut ne pynjulor ïa kane ka jaka.
Kumta, ula kyrpad ïa ka ïing bishar ban phah notice sha ki bor pynïaid District bad sha ki kynhun shimet bad ba dei ruh ban pynmih ïa ka hukum halor kane ka kam.