KI RIEWSHLUR KIBA NGIM JUH TIP JUH BNA

Da u, Chandame Sungoh Chutwakhu , Jowai

0

Kat kum ka jingthoh jong u historian ba pawnam jong ka jylla Assam U Dr. S.K. Bhuyan u ong baki Mikirs kiba tip mynta kum ki Karbi ki phet ïap na shiliang jong ka wah Kupli bad na Kaziranga (ka National Park ba pawnam jong ka jylla Assam) namar ka jingshah hiarthma haki syiem Kacharri bad ki wan chong wan sah sha Rilum Jaiñtia hapoh ka jing synshar bad ka jingshah sngewbha jong ki Syiem Jaiñtia.
Kane ka lah ban long haka snem 1600 A.D namar ba wat ka Hima Jaiñtia ruh ka shah hiarthma bad shah synshar lem hakine ki syiem. Lada ngi peit kat kum ka history jong ka Hima Jaiñtia te kane ka lah ban long haka por jong ka jingsynshar jong u syiem Dhyan Manik bad Jara Manik namarba kine ki syiem ki synshar naduh ka snem 1596 haduh 1625 A .D.
Kat kum ka khana pateng jong ki Karbi la ong ba ki wan phet shong shane haka por u syiem jong ki u Rengbonghom. (reng ka mut ka snep ne ka snieh bad bonghom ka mut u pathaw, kumta rengbonghom ka mut snieh pathaw) Ymlah ban tip ïaka kyrteng trai jong u ne u syiem hynrei la ong ba u ïoh iakane ka kyrteng namarba u shu pyneh snieh kum u pathaw haka por ka jinghiar thma jong kine ki syiem. Haduh mynta ruh hapdeng ki Rongkhang (rongkhang ka mut syriem kum ki hima ne elaka haka ktien jong ngi) la ïoh ban long syiem tang kane ka kur.
Ym lah ban tip shai tip tikna ïaki por ki snem, hynrei napdeng ki Karbi kiba wan phet wir shane don u wei u khlawait u ba kyrteng u Thong Nokbe Teron (nokbe ka mut u ramhah u riewkhlaiñ syriem kum u Samson haka Baible) haka por jong u ne u Thong Nokbe ki Karbi ki ïoh bha ïaka jingieit jingsbun haki syiem Jaiñtia bad u long ruh u kapten thma ba ha khmat eh jong ki syiem Jaiñtia haka ta ka por.
Kat kum ka jingïathuh khana jong ki Karbi bad katto katne naki riew rangbah jong ka thaiñ mihngi jong ka ri Jaiñtia te u ne u Thong Teron u don bynta ruh haka ba pynïeng ïaki Mawbynna kiba don haka shnong Nartiang , West Jaiñtia Hills District ïaka ba la ithuh daka Indian Archeological Survey bad u mar ne ramhah jong ka ri Jaiñtia U Mar Phalangki. Nalor kine u pynïeng ruh bun ki maw pynïeng kiba don kylleng kylleng jong ka thaiñ mihngi Jaiñtia kum sha ki thaiñ Raliang bad Labang Nangphyllut.
Hapdeng ka jingieit bad jingshaniah jong ki syiem Jaiñtia ïa u ne u Nokbe, hynrei la ong ba u la sdang ban shet kylla bad suhbuit ïa u syiem ban hiarthma kylla ïaki bad ban knieh noh ïaka synshar khadar. Nalor kane u la sdang ruh ban leh khlem akor bad jrongkti ïaki kynthei khynnah. Kumta naka ne ka daw ki syiem Jaiñtia bad ki khun ki raïot jong ka hima hi kila rai ban pynïap noh ïa u . Namarba u long u ba khlaiñ u ba shlur bad u stad thma te ki shem jingeh bha ban ïoh lad ban pynïap ïa u , kumta ki wad da ka buit bad thaw lad thaw lynti ban ïoh pynïap ïa u daka ba suk.
Kat kum ka jingïathuh khana na i meirad Rymbloñ Lyngdoh Umphlang bam kwai ha dwar U Blei i ong ba ïa u ne u Thong Teron la pyniap daki Pnar ha Raliang ka jaka kaba don hapdeng jong ka shnong Raliang bad Khonshnong. Uwei u rangbah Karbi u ba la khlad noh u ba kyrteng u Sarthe Dera ruh u ong ba ïa u Thong Teron la pynïap daki Pnar, u ong kumne, “Thong Nokbe a phan ke Chomangpi a tum si ka pathi, Raleng (kamut Raliang) lapen Khonchenong (ka mut Khonchnomg) a long”. Haka ktien Khasi kamut kumne, “Ia u Thong Nokbe la pynïap daki kynthei Pnar haka shnong Raliang bad Khonshnong”.
La ong ba haka por ba la ih bha u sohpieng saw hakane ka jaka, ki thei bhabriew jong ka shong Raliang bad ka Khonshnong kila pynbieij ia u Thong ban kiew bad kheit sohpieng ha ryngkat ka kren pynbieij kren ieit kren biria. Katba ki shynrang pat daki spah ngut ki ïa apthap hapoh sañium hajan u ta u trai dieng sohpieng ha ryngkat bad ki wait ki sum ki khnam bad ryntih. Tang shu kiew u Thong shalor dieng kham shakliar sha ki tnad rit ba don soh, ki shynrang kila mih bad siat da ki khnam ki ryntih bad kawang da ki sum khlem sangeh.
U Thong ruh haba u la ïoh i ba u la shah shet kylla te u la kawang dakita ki sohpieng im, u la kdiah daki tnad sohpieng kiba heh ba heh bad kawang ïaki. Wat hapdeng ki khnam bad ki sum ba her wut wut sha u kumba hap u slap ruh u dang hiar bad kynthih nangta nalor dieng bad beh bad kawang ïaki. La ong ba ki Pnar ki khun ka elaka Raliang ruh ym duna ïaka laiphew sawphew ngut kynthei bad shynrang kiba shah pynïap haka ne ka thma. La ong ba kat haba u kyllon ïap te ka met jong u kam bit shuh sha khyndew ka sah khongreng halor khnam bad sum la kum ki speh diengkhied.
U nongthoh poitri ba pawnam jong ki Karbi u Elisha Hanse u thoh kumne, “Tharve angsong bat long bin, Thai rangkap pen ap rin rin; La an a jakong kethe, Ta thi nangkok lo Thong Nokbe”. Haka ktien Khasi kamut kumne, “Ki la ïoh ban pynkiew halor dieng sohpieng, Ki ïasiat khlem sangeh da u khnam ka ryntih; Kat ka bor bad jingkhlaiñ jong u Thong Nokbe tub, U hap ban kyllon ïap ha juh.” Kane ka jingthoh ka pynshisha shuh halor ka ne ka khana.
Da lade nga la pyrshang ban wad jingtip naki riew rangbah bad ki nongshong shnong jong ka thaiñ Raliang thaiñ Khonshnong bad naki nong shong shnong jong ka ri Jaiñtia hi baroh ka wei hynrei ym don batip ba bna ei ei ruh sha phang kane Lyngba kane ka jingthoh nga kyntu ïaki riewstad riew shemphang jong ka Ri lum Jaiñtia ba kin wad bniah wad jingtip shuh shuh halor kane.
Haba kiwei ki jaitbynriew naka wei ia jaka ki tip ïaka jingjia kaba jia hapoh ka ri jong ngi te te balei ngi pat ngim tip? Wat ai ba kan long kumba ong kato ka kyntien, “Jingstad ngi wad kylleng pyrthei, Jingtip kari ngim bna ei ei”.

Leave A Reply

Your email address will not be published.