Ka sorkar jylla ka pyndonkam da ki phew hajar klur tyngka man la u snem. Ka bhah kaba bun – kumba 90 % ka wan na ka sorkar kmie. Ka jylla Meghalaya kam don jingmih ei ei na lade lait noh tang ki khajna kiba ïoh lum na ki tiar die shane sha ka jylla ïa kiba wanrah nabar. Nangta don ka khajna halor bun jait ki kyiad phareng (excise duty on Indian Made Foreign Liquour), nalor ka pisa kaba ka sorkar kmie ka buria ïa ki sorkar jylla na ka GST (Goods and Services Tax) – kane ka dei ka khajna halor ki tiar ki tiar kiba wanrah nabar bad ruh ki rukom jingtrei kiba har rukom. Ki hotel bad restaurant ki lum ïa ka GST ba man ba ngi thied wat I tiar iba rit ruh ngin ïohi ha ka cash memo (resit) ba hap ban siew GST.
Bunsien ngim ju pynleit jingmut ïa kine kiei kiei baroh namar ngi tharai ba ka kam lum khajna ka dei ka jingkitkhlieh jong ka sorkar bad kam ïadei ei ei ruh bad ngi. Hynrei hangne ngi bakla. Ngi kum ki paidbah kiba peitngor bad kiba don ka jingkitkhlieh ngi dei ban shim khia ïa ki kam kiba ïadei bad ka synshar ka khadar bad khamtam ha ka jingpynlut jong ka sorkar ïa ka pisa paidbah (public money) ïa kaba ngi don hok ban kdew bad pan jingkheiñ.
Man u snem ha ka taiew bakut eh jong u bnai Lber, ka ophis jong U Comptroller & Auditor General (C&AG) ïa kaba la peit da ka sorkar kmie ka pynmih ïa ka kaiphod ha kaba ka kdew sani ïa ki jinglut jingsep bad ki jingïoh baroh jong ka sorkar jylla, kynthup ruh ïa ka ram ba ka sorkar Meghalaya ka shim na ki bank bapher bapher. Kabe ka kaiphod ka kdew ruh ïa ka jingpynlut ha kawei pa kawei ka tnad sorkar bad ka kdew ruh ïa ki jingduna kum ha ka jingbym pynbiang ïa ki jingkheiñ bad ki receipt haba la pynlut ïa ka pisa ha ki kam pynroi bapher bapher. Ha ka kaiphod kaba la pynmih dang shen ka ophis C&AG ka kdew ïa ki katto katne ki department ha kiba ka jingtrei kam ka dkoh bha bad kim shym pynbiang ïa kita ki receipt ban pynshisha haei ki la pynlut ïa ka pisa paidbah. Kine ki departments ki long (1) Ka Community & Rural Development Department lane ka tnad kaba dei peit khnang ïa ka roi ka par ha ki nongkyndong. Kane ka Department ka lah pynlut haduh 1137.40 klur tyngka (shi hajar shispah laiphew hynniew klur bad 40 lak tyngka) (2) Ka Planning Department – 457.58 klur (sawspah sanphew hynñiew klur bad sanphew phra lak tyngka (3) Health & Family Welfare lane ka Department kaba peit ïa ka koit ka khiah ka khlem ai ki receipt na ka bynta 272.22 klur tyngka (ar spah hynniewphew ar klur bad arphew ar lak tyngka (4) Social Welfare Department 198.99 klur tyngka (shispah khyndaiphew phra klur bad khyndaiphew khyndai lak tyngka (5) Education & Human Resources (Ka Department ba pynïar ïa ka ka thoh ka pule) 171.78 (shispah hynniewphew wei klur bad hynniewphew phra lak tyngka. Kabe baroh ka pisa ka kot sha ka 2237.97 klur tyngka.
Ka jingkylli ka long balei ba ki department kim lah ban pynshisha ïa ka lut ka sep lada ki la pynlut shisha ha ki skim bapher bapher. ïa ka pisa paidbah ym lah ban leh kum ka pisa lajong ban pynlut katba mon. Ha ka liang jong ka Department C&RD kaba dei peit kyrpang ïa ki paidbah kiba shong ba sah ha nongkyndong bun ka pisa la pynïaid lyngba jong ki Block ïa kiba la peit da ki Block Development Officer (BDO). Kine ki BDO ki long kum ki syiem kiba synshar ïa ki paidbah ha nongkyndong kiba ym nud ban buh jingkylli na ki lane ban pan jingkheiñ hi ruh. Lehse lah ban don wei ar ngut eh ki BDO kiba don ka jingkitkhlieh ban ai ka jingshakri hok ïa ki paidbah hynrei kiba bun hi ki long kiba bamsap bad ïa kane lah ban ïohi lyngba ka jinglum spah jong ki bad ka jingpynïeng ïa ki ïing paki dulan. Lada wad jingtip bha kumno uta lane kata ka BDO ki ïoh lum spah lehse kane ka jingbam sap kan ym da saphriang eh hynrei ki nongpynïaid shnong (rangbah shnong/sordar shnong) bun ba ki tieng ban kylli jingkylli than namar ïoh thut u/ka BDO bad ïoh duh noh syndon wat ka skim kaba rit ba ria ruh. Ka dei kane ka jingbym sngewthuh jong ki nongpynïaid shnong ïa ka bor bad ka iktiar jong ki kaba pynlong ïa ki babu sorkar bad ki MLA ba kin kheiñ niut ïa ki. Kynmaw ba u rangbah shnong/sordar shnong u don hok kumba don u MLA ban leit tied ïa ki jingkhang jong ki department bapher bapher bad ban ïakynduh ïa ki ophisar kiba kham heh ban leit dawa na ki ïa ka hok ki paidbah ha nongkyndong. Haba u BDO u leh bymkit khlieh ïa la ka jong ka kamram dei ban pyntip sha U Secretary jong ka C&RD uba shong ha Secretariat. Lada kata ruh kam trei kam dei ban leit ud sha u Chief Secretary ruh. Ym dei ban riej ban leit dawa ïa ka hok ki paidbah.
Kane kam dei shuh ka juk ban shu ap tang ïa ki skim ba wan lyngba ka Block. Ki don bun kiwei pat ki skim ruh lada wad jingtip na ki department bapher bapher. Ki nongpynïaid shnong ki dei ruh ban ïathuh ruh ha ki lad pathai khubor shaphang ka jingbympoi ki skim bapher bapher ha shnong. Ka sorkar ka kam sarong ba ka um ka la poi lut ym tang sha ki shnong baroh hynrei ha ki thliew ïing jong baroh ki nongshong shnong lyngba ka Jal Jeevan Mission. Hynrei ngi tip shai ba bun bah ki shnong ha kiba ki briew ki hap leit kit um dih na jngai bha. Hato kam dei ka kamram jong ki rangbah shnong/sordar shnong ba kin kyntait mardor ïa kita ki jingkam ka sorkar? Lada ngim trei bor bah ban pynpaw pyrthei ïa ki ktien lamler jong ka sorkar te ngin sa shu shah ïalam bakla kumne kumba la long mynta lah 50 snem.
Dei na kane ka daw ba ngi dei ban jied ïa ki rangbah shnong/sordar shnong kiba lah nang lah stad bad kiba lah ban pule bad bishar ïa kata ka CAG report ban tip haduh katno ngi ki paidbah ngi la shu shah ïalam bakla. Lehse don ki skim kiba pyni ba la pyndep tang ha ki file ophis katba ha madan pat ym don ei ei. Ka jingtlot ha ka jingtrei kam ka sorkar ka long ba ym don ba buh jingkheiñ (evaluate and monitor) ïa ka jingpynlut halor kano kano ka skim ka long shisha ne em kumba la kam da ki ophisar ne ka shu long tang ka jingkam ha lyer katba ha ka jingshisha khlem da don ei ei kum kata ha madan? Teng teng lada ïoh u MLA uba buddien te ki ophisar ki kham kitkhia hynrei u MLA un lah peit haduh katno haba da ki spah tylli ki shnong hapoh uwei uwei u MLA.
Dei na kata ka daw ba ki nongkit kam shnong ki don ka jingkit kaba khia ïa kaba ki dei ban pyndep. Ki dorbar shnong ki dei ban don ka jingïadei kaba jan bha bad kita kiba pynïaid ïa ki kam bapher bapher. Ha kajuh ka por ki dei ruh ban pyni ïa ka bor bad ka iktiar jong ki bad ban wad ïa ki jingkheiñ jingdiah baroh namar ba ki mihkhmat ïa ki paidbah. Ka synshar paidbah ka sur u paidbah ka dei kaba donbor tam. Lada ngim pyndonkam ïa kata ka sur te ngin sa ïoh da ki nongsynshar kiba thala bad ki bym salia la ngi sahdien ha ki liang baroh.
