Kane ka jingjied ia ki Nongthawaiñ sha ka ïing Dorbar Thawaiñ jong ka jylla ha kane ka kynti ka long kaba kham kyrpang eh lada ïanujor bad baroh ka jingjied ha kine ki snem kiba la leit. Kumba ka jylla ka dang shu dep ban rakhe ïa ka jingdap sanphew snem ne ka Jubili Ksiar jong ka jingïoh ïa ka jylla Meghalaya ba pura. Baroh shi katta bun na ngi, ngi la ïaklet shisha ban pyndonkam ïa ka ktien Nognthawaiñ bad ngi la ju ïa ong beit da ki nongmihkhmat, bad ka la long sting thew bha bad ka la jia ruh kumta. Hynrei ha kane ka kynti ngim dei shuh ban dang khot da ki nongmihkhmat hynrei dei da ki nongrthaw aiñ beit. Kumta ki paidbah baroh ki dei ban kyndit bynriew noh ha kane ka kynti ban ym jied shuh tang ïa ki nongmihkhmat hynrei dei ban jied beit da ki Nongthawaiñ. Kata ka mut ban jied ïa ki briew kiba don ka jingshemphang bad ka jinglah ban thaw aiñ.
Namar jong ka jingjied da ki noingmihkhmat ha baroh kine ki snem ka la wanrah shisha ïa ka jingdkoh bad jingsahdien jong ka jylla ha kiba bun bah ki liang namar ba kat haduh mynta ka Jylla kam pat lah satia ban don ïa la ka jong ka aiñ, lait noh tang aiñ bat khyndew bad katto katne kiwei pat kiba rit ba ria wat ba ka jylla ka la kynjoh sha ka sanphew snem ne kata ka Jubili Ksiar. Ha kine ki sawphew tylli ki snem ka jylla ka la ïoh ïa kawei ka sorkar hadien kawei pat hynrei baroh ngi la ïa sakhi shibun ki kam ïakhnieh shuki bad ki kam bamsap bad ym shym la lah ban thaw ïa ki aiñ kiba dei na ka bynta ka im ka ïap jong ka jaidbynriew.
Kawei na ki aiñ kaba la sahkut kumto khlem kano kano ka jingpynkylla kat kum ka jingiaid ka por ka dei ka aiñ thungkam thungjam kat kum kata ka bhah kaba dei na ka bynta ki Khasi-Jaintia bad Garo ka la long shisha kaba noh shilliang katta katta. U Pud u sam naduh ba la sdang ïa la ka jong ka jylla u la noh tang ka suiñ bad ki shnong jong ki thaiñ ki ïai im ha ki jingïakynad naduh Langpih haduh Block I & II bad kiwei pat ki thaiñ khappud. Hooid dang shem shuwa kane ka Elekshon ngi la ïohi ba kane ka sorkar MDA ka la pyrshang ban pynbeit ïa u pud u sam, hynrei ka long kaei kaei kaba long pher ban ïohi pat ba kam shym la don satia kata ka jingïahun na ka liang jong ki paidbah. Kyrmen ba ka sorkar kan lah ban pynshai halor katei ka phang khnang ban lait na kino kino ki jingsahteng ne sah ha u dak jingkylli ?
Kumba ka jylla ka la jam sha ka jingdap kaba san rangbah bha ha ka rta kaba sanphew snem, kumta ka long kaba donkam ïa ki paidbah nongshnong shnong ka jylla ba ha kane ka kynti kin jied beit da ki Nongthawaiñ kiba tbit ban weng noh ïa baroh ki jingeh jong ki paidbah. Ha baroh kine ki snem kiba la dep ki paidbah kim pat pei phang ki la shu ïa jied wat ïa ki briew ki bym tip wat tang ïa ki aiñ bad ki riti synshar jong ka jylla bad ka ri. Ngim phylla balei ba ka jylla jong ngi ka sahdien haduh katne katne ka daw baroh ka long ba kum ki paidbah ngim long kiba shemphang. Khamtam lei lei ki paidbah nongkyndon bapli tang la ïoh pisa ki ñiew beit ba kata ka la biang na ka bynta jong ki.
Ha kane ka kynti baroh ki paidbah ki donkam ban kyndit thiah ba kane ka por elekshon kam dei satia ka por Khrismas ban ïa ïoh mit mit ei kum ki khynnah rit na u Santaklos, hynrei ka dei ka bynta jong ka ïap ka im jong ka ri bad ka jaidbynriew ba ka jylla hi baroh kawei. Ka jaidbynriew mynta ka la donkam shisha ïa ki nongthawaiñ ban thaw ïa ki aiñ na ka bynta ban lah ban kyrshan ïa ka lawei jong ki samla, ka aiñ ban ïada ïa la ka jong ka ri bad ka jaidbynriew rit paid, ka ain ban ïada ïa ka jingshah khnieh lut ïa ki kam ki jam, ka kamai ka kajih ha kiwei pat ki jaidbynriew heh paid ka ri India bad wat ki briew kiba nabar ka ri ruh kumjuh kiba wan tuid na ki ri kiba marjan khamtam lei na ki thain Nepal bad Bangadesh.
Ha kane ka kynti ka por ka la dei ïa ki paidbah ban kyndit bynriew ban pynkut noh shi syndon ïa ka kam bamsap da kaba dkhat noh ïa ka bor jong kito kiba mlien ban thong da ka pisa ha ka por elekshon. Kata ban shim beit ïa ka pisa kaba ki ai ei hynrei ba sha lynti tlod kim dei satia ban thep vote ne kyrshan ïa kito ki briew kiba thong da ka pisa namar ba ka long kumba ki thied ïa ki vote bad pynlonr mar khaïi ïa ki paidbah. Da kaba leh kumta kan pynkut syndon ïa ki jingmlien jong kito kiba bei da ka spah na ka bynta ban thied tad ïa ki paidbah khnang ban ïoh bamsap pat hadien ba ki la dep jop.
