Ki nongmihkhmat kiba don ka mynsiem ban leh kput ne leh shilliang khmat kim pat dei ki nongmihkhmat

Nongpoh, Lber 28: Haka elekshon MLA ba dang shu dep ban jied ïaki nongmihkhmat ka ïing Dorbar thawaiñ ka jylla, la iohi ba kala don ka jingpynksan na kawei ka seng saiñpyrthei sha kawei pat, ka jingsei ki ñia ki jutang bad ka jingïa kawang ktieh hapdeng ki nongïalam jong ki seng saiñpyrthei bapher bapher bad hapdeng ki para kyrtong nongmihkhmat.
Haka jingïaleh ka don ka jingjop bad ka don ka jingrem, don u ba jop bad don ruh u ba rem, hynrei ka dei ka kamram jong kita kiba jop kiba la shah jied napdeng ki nongïaleh ban kit ban bah ïaka khia ka shon jong ki paidbah, ka dei ka kamram jong kita kiba shah jied ban trei naka bynta ka bit ka biang, ki jingdonkam jong ki paidbah, khlem da leh shilliang khmat ïano ïano la ki dei kiba kyrshan ne ki bym kyrshan ruh haka por elekshon dei ban peit bad ïarap.
“Ki nongmihkhmat kim dei ban leh kput ne leh shilliang noh tang namar ba kim kyrshan, ki nongmihkhmat kiba don ka mynsiem ban leh kput ne leh shilliang khmat kim pat long ki nongmihkhmat ne ki nongïalam kiba shakri paidbah”.
Kum ki nongmihkhmat, ki nongïalam bad ki nongshakri paidbah ki dei ban long ki briew kiba ïai shah, ïai map, kiba sngewrit, kiba stad, kiba shemphang, kiba iohi jngai naka bynta ka lawei ba phyrnai haka imlang ka sahlang bad ka shynshar khaddar padiabh kaba khuid khlem da leh shilliang khmat ïano ïano ha kano kano ka bynta ba ïadei bad ki paidbah namar ki don ki nongmihkhmat kiba ju leh shilliang khmat ban peit ïaka eh ka shon ki paidbah tang haki jaka ba ki don nongkyrshan hynrei ban peit mad dong ïa kiwei pat.