Nongpoh, Nailar 06: Ka KSU Tyrso Unit hapoh ka jingïalam jong u samla Player Mashli President ryngkat bad ki dkhot mynta ka sngi kala leit ban khang tala syndon ïa u tower airtel ba don ha katei ka shnong hadien ka jingud jingnam jong ki paidbah naka jing bym treikam ka network airtel ha katei ka thaiñ.
Naka liang u Samla Player Mashli u la ong ba kum ka seng ka dap da ka jingsngewkhia kaba jur halor ka jingeh ba ki paidbah ki ïakynduh nakadaw ka jingbym biang ka network airtel ha katei ka thaiñ kaba ki paidbah ki mad jingeh bad ka jingduhnong kaba khraw ba kam myntoi ba kin thep pisa haki simcard jong ki namar ba kim ioh pyndonkam.
U la ong ruh ba ka jingdon u tower Airtel ha katei ka thaiñ kam don jingmut, kumba ki paidbah ki khmih lynti namar haka shi sngi ki paidbah ki ioh pyndonkam tang 1 kynta lane 2 kynta.
Naka liang ka seng kala buh ruh ka jingkyrpad ïaka kompani Airtel ba ka dei ban pynbiang mardor ïa ka network ha katei ka thaiñ bad kam dei ban plie ïa utei u tower tad haduh ba kan da lah ban pynbiang ïaka network naka bynta ka jingbit jingbiang jong ki paidbah.
