Ki mishoneri ki dei ki agent jong u Blei, ong u MP ha jingrakhe 150 snem ka Umlyngka Pres. LP

Shillong, Jymmang, 16: Ka Umlyngka Presbyterian Lower Primary School Umlyngka ha ka sngi Thohdieng ka la ynhap pyrda ïa ka jingrakhe dap 150 snem ka jingshakri ïa ka thaiñ baroh kawei ha ka liang ka pule puthi naduh ka snem 1875.
Ïa kane ka jingrakhe pynhap pyrda la donlang u MP Rajya Sabha ka Jylla Dr . W.R Kharlukhi kumjuh u Nongai buit jong u Myntri Rangbah ba dei ruh u MLA barim Bah Hamletson Dohling kum u Symbud Kongsan ryngkat ki Pastor, Tymmen Basan, ki nongïalam Balang, ki Nongïalam Shnong, ki nonghikai bad ki kmie ki kpa.
Haba kren ha kane ka sngi kum u Kongsan, u MP u la ong ba ka long ka kam kaba khraw haduh katta katta ba katei ka skul ka la lah ban kam ïa u mawmer ba 150 snem ha ka pule puthi.
“Ban ong ba la 150 snem kane ka skul ka la shakri ka la dei ka kam kaba khraw bha,” la ong u MP.
Ha kajuh ka por u ong ruh ba ki mishoneri kiba wan ban seng skul 150 snem mynshwa ha kane la thaiñ ki dei ki agent ba la phah da u Blei ban wanrah ïa ka jingshai ïa ka shnong ka thaw lyngba ka pule puthi.
Da kaba ai burom ïa ki nonghikai ha kine ki 150 tylli ki snem, u Kongsan u la ong ruh ba wat ïalade u kham sngewtynnad ban pynithuh kum u nonghikai ym kum u MP namar ka kam nonghikai.
Na ka liang u Bah Hamlet ha ka jingkren u la ong ba lada kren ïa ka 150 snem ym lah khlem da phai sha ka mynnor, kumno ba ha ki 150 snem mynshwa ki mishoneri ki poi ban mutdur ban seng skul ha kine ki jaka. “Dei ka jingïalam lynti jong u Blei ba la lah ban seng ïa kane ka skul ban pynroi ïa ka jingnang jingstad ha kane ka thaiñ,” u la ong.
Haba pynpaw ïa ka jingsngewnguh ïa kane ka skul kaba la shakri ha kine ki 150 snem, u Bah Hamlet u la ong ruh ba ki skul Balang ki la ai ka jingshakri kaba bha tam na ka bynta ka pule puthi ha kane ka Jylla.
“Nga kyrmen ba ka jingïaid lynti jong kane ka skul kan nang janai bad na kane ka skul kin mih ki khlur kiban shakri ha ka imlang sahlang bad ha ka jaidbynriew.
U la ong ruh ba ki nonghikai ha ki Lower Primary ki sngewthuh bha ïa ka lyngkor kum ki nonghikai namar dei ma ki kiba maitlynti ïa ka tynrai jong ka jingim ki khynnah ha ka jingnang jingstad.
U Bah Hamlet u la ïathuh ba ki skul Balang ki la don ka bynta kaba khraw ha kaban noh synniang ban kyntiew ïa ka pule puthi ha ka jylla.
“Kumta ngi sngewnguh ïa u Blei U ba la phah ïa ki Balang ban seng ïa ki skul na la bynta ban pynïar ïa ka jingnang jingtip kylleng ki bynta jong ka jylla.”
La pynphuh shuh shuh ïa kane ka prokram da ka jingplie ïa u mot sahkynmaw nangta ka jingpyllait paidbah ïa ka thup sahkynmaw nalor ki jingrwai jingshad bad ki jingïalehkai bapher bapher na ki khynnah skul.