Nongstoiñ, Jymmang, 16: U slasha u dei u mar rep u ba ai jingmyntoi haduh katta katta ïa ki paitbah nongrep, namar u dei u ba neh slem bad u ba ïaid ïew ha kylleng ki ri ka pyrthei ynda la dep saiñ ha ka rukom kaba paka.
Ka jinglong jong ka suiñ bneng bad ka jingshit jingkhriat ha ka jylla ym lah ban len ba ka Meghalaya, ka dei ka jylla kaba biang tam ban rep sla sha. Hynrei haduh mynta ki paitbah nongrep kim pat ïabeh ban rep, namar lada rep bun ki hap ban don ïa ki karkhana ha kajuh ka jaka na ka bynta ban saiñ bad shna ïa u sla sha haduh ba un da long ban shalan sha kiwei pat ki jaka.
Ki nongrep jong ka West Khasi Hills kiba na ka thaiñ Riangdo kumba katto katne snem mynshuwa ki pyrshang ban rep, hynrei na ka jingbym lah ban sumar bha, ki la hap ban sangeh noh. Haduh mynta ka don satang kawei ka jaka rep slasha ha ka shnong Riangdo kaba hap ha ka jingpynïaid jong ka Directorate of Horticulture jong ka sorkar jylla.
Ha ka jingleit jurip jong u nongthoh khubor jong u Mawphor ïa katei ka kper slasha, la lap ba ka long ka kper kaba heh bha bad ki don ki longkmie kiba trei ha katei ka kper sla sha ka ophis jong ka tnad horticulture. Nalor kata la lap ruh ba ka sorkar ka la sdang ban pynbiang ïa ki mashin bad ki tiar ki tar na ka bynta ban saiñ ïa u sla sha ba la dep kheit.
Ka jingdon jong katei ka kper sla sha ha Riangdo, ka la long ruh ka jingmyntoi kaba khraw ïa ki longkmie na katei ka shnong kiba trei man la ka sngi ha katei ka kper sla sha. Hynrei haba pyrshang ban kylli na kitei ki longkmie ïa ka rukom trei ki la ong ba haduh mynta haba ki trei ha katei ka kper ki dang trei tang kum ki muster roll ne ki ba shu bylla sngi.
Haba peit ïa ka jinglong jingman jong katei ka kper la lap ruh ba ka jingthung ïa u sla sha ka ïarap haduh katta katta ban pynneh ïa ka khyndew namar wat lada jur slap katno katno ruh ka khyndew ka neh.
Kumta ha kaba ïadei bad ka rukom rep sla sha imat ka por ka la dei ba ka sorkar kan pynshlur ïa ki paitbah kiba don bun ki jaka ban rep sla sha bad ban mang pisa kyrpang ruh na ka bynta ki nongrep sla sha da kaba pynlong ruh ïa ki jingai jinghikai kiba bniah ba kumno ban pynmih sla sha. Nalor kata ka sorkar kan thaw lad ruh ban buh da ki karkhana kiba heh ban saiñ pynkhuid haduh ba un da long ban shalan sha kylleng ki bynta jong ka ri.
