Ki kor technology ki dei ki atiar ba lah ban pynbeit ïa kiba bun ki jingeh ha ka jylla, Conrad Sangma

Shillong, Ïaïong 24: U Myntri Rangbah ka Jylla u Conrad K Sangma, ha ka sngi Palei u la plie ïa ka Workshop ba ar sngi halor ki Technology ba dang shu mih ba la pynlong ha State Convention Centre, Shillong. Ïa kane ka workshop, la pynlong da ka tnat Information Technology & Communications (IT&C), ka sorkar Meghalaya da ka jingïatreilang bad ka National e-Governance Division (NeGD), ha kaba ha kane ka prokram la wan ban ïashim bynta da ki riew pawkhmat bad ki riewshemphang na kylleng ka jylla bad ka ri.
U Bah D.P. Wahlang, Chief Secretary ka sorkar jylla, u Pravin Bakshi, IAS, Commissioner & Secretary, ka Kong Idashisha Nongrang, IPS, Director General of Police, u R.S. Gill, IFS, Principal Chief Conservator of Forests and Head of Forest Force, Bah K.L. Nongbri, Joint Secretary, IT&C Department, u Nand Kumaram, President bad CEO NeGD (joining virtually); bad u Dinesh Didel, Director – Technology Management, NeGD, ki heh ophisar na ki tnat bapher bapher, na NIC, DoT, ki jaka pule kum ka IIM Shillong, NIT Meghalaya, NEHU, ki nongmihkhmat na ki startup bad ki civil society organization ki la wan shim bynta ha ka prokram plie.
Ha ka jingkren sdang u Myntri Rangbah ka jylla kum u kongsan u Conrad K Sangma, u la banjur halor ka jingdonkam ka jingkylla ha ka bor jong ka technology ha ki rukom treikam naba ka long ka atiar kaba lah ban pynbeit ïa ki jingeh ha ka pyrthei bad ban pynbha ïa ki kam paidbah kiba don mynta. U la pynpaw ïa ki kam ba la jop jong ka Meghalaya’s e-Proposal and digital file movement systems hapoh ka Meghalaya Enterprise Architecture framework. U Myntri Rangbah u la kdew ruh ba watla u don shajngai na Shillong, u la lah ban pynlait ïa ki file tang da ka mobile device jong u, ha kaba kane ka pyni ïa ka jinglong kongsan jong ka real-time digital governance.
U la pynpaw ruh ïa ka jingïaid shaphrang ki kam ka jylla da kaba pynduna ïa ka jingkhlad ki longkmie ba armet da jan 50% lyngba ka jingpyndonkam ïa ka technology ban lap bad ban kyrshan ïa ka jingma jong ki longkmie ba armet. U la kren ruh shaphang ka jingdang ban buh ïa ki IoT sensor ha kylleng ka jylla ban khmih ïa kumba 70,000 hajar tylli ki water spring ban ïohlum ki jingkheiñ ha ka por ba biang ban lah pynbha ïa ki tyllong um, da kaba bynrap ba kane ka project ka thmu ban don ka rukom pyrkhat kam kaba bha bad kumjuh ki jingpyrshang ban pynneh pynsah ïa ki.
U Myntri Rangbah u la pynbna ruh ba shen ka jylla kan sa pyntreikam ïa ka blockchain-based employee data and promotion tracking system ka ban sdang shwa na ka tnat pulit. Kane kan ïarap pynduna ka jingpynslem bad kan wanrah ka jingtreikam kaba khuid ha ki jingthungkam thungjam bad kiwei ki kam.
Ha kaba khatduh u Myntri Rangbah u la pynthikna ïa ka jingangnud ka Meghalaya ban long ka IT bad digital service hub ha kane ka thaiñ shatei lammihngi. U la kren ruh halor ki kam jingtei kum ka jingpynheh ïa ka Shillong Tech Park, ka jingwan ki five-star hotel, ban pynbha ïa ki kam liengsuiñ da kaba wanrah bun ki liengsuiñ kiba heh ba kin hiar hapoh u snem 2026, bad kiwei.
Haba kren ha kane ka prokram na ka liang u Chief Secretary Bah D.P. Wahlang u la ïaroh ïa ki kam ba la ïaid shaphrang ba la leh da ka jylla halor ka digital governance, da kaba ong ba ka la long ka jingjop haba ïadei bad ka jingpyntreikam ïa ka e-file system kaba la wanrah jingmyntoi ha ki rukom treikam ka sorkar. U la kren ruh halor ka jingthaw ïa ka Drone Technology Lab ka sorkar jylla, ba la pyndonkam mynta ban jurip ïa ki jaka tih dewïong, ki khlaw bad ki kam jngohkai.
U la kren ruh halor ka jingpyndonkam ïa ka VR ha ka pule aiñ, da kaba pynïasoh bad ka National Law University ha Shillong. La ïoh ruh ka jingkren na u Nand Kumaram, President and CEO of NeGD.
Kane ka workshop ba arsngi kan kut da kaba ïakren halor ka Artificial Intelligence, Blockchain, Cybersecurity, UX ha ka rukom treikam ha ka sorkar bad ka Public Digital Infrastructure.