Nongstoiñ, Nailar, 13: Ka Nehru Yuwa Kendra Sangathan kaba hap hapoh jong ka Ministry of Youth Affairs and Sports, sorkar Indïa, ha ka sngi saitjaiñ ka 12 tarik Nailar 2023, ka la pynlong ïa ka District level ‘Yuwa Utsav’, halor ka phang ‘PANCH PRAN’ ha Khatsawphra College, Mairang, ha kaba bun ngut ki khynnah samla pule napoh ki skul bad kolej kiba don napoh jong ka District, ki la wan ban ïa shim bynta ha kane ka prokram.
Ka ‘PANCH PRAN’ ka don san tylli ki thong kiba kongsan bad kita ki long, ka thong ban pynroi ïa ka Ri India, ban weng noh ïa ka jingmut jingpyrkhat jong ka jingsynshar phareng, ban sngew sarong ïa la ka jong ka nongkynti kaba la hiar pateng, ka jingïalong shi tylli bad ka jingïatreilang bad ban pyndep la ka kamram kum ki nongshong shnong ka Ri India.
U Bah A.Nongbri, Additional Deputy Commissioner, Eastern West Khasi Hills, District, u la plie ïa kane ka prokram kum u Kongsan bad la synran lang da I Dr. L.R. Hynniewta, BDO Mairang C&RD Block Mairang, ryngkat lang ruh u Bah D.Rapsang, Officer In-charge NYKS Nongstoiñ, u Bah Boldness L.Nongum Principal ka Khatsawphra College, Mairang, ki nongtrei sorkar na ki tnad kiba pher bapher, ki nonghikai skul, kolej bad kiwei kiwei.
U Bah A.Nongbri u la ai ka jingïaroh ïa ka NYK kaba la pynlong ïa kane ka prokram na ka bynta ka jingmyntoi jong ki khynnah samla bad u la kyntu ïa ki samla ba kin ïashim bynta manla ka por la ha kino kino ki prokram kiba la pynlong da ka NYK ne da kiwei pat ki tnad sorkar, khnang ba ïa ki sap ki phong jong ki, yn ithuh bad sakhi ym tang hapoh District hynrei wat shaduh ka jylla, ka ri bad ka pyrthei hi baroh kawei.
U la ong ba ki samla kim dei ban buhrieh ïa ka sap ka phong jong ki, hynrei ban pyndonkam janai ïa kita ki sap ki phong ba ki don, khnang ba kan long kum ka lad ïoh kam ïoh jam ha ka jingim ka jong ki. Ki samla kim dei ban buh ïa ki jingeh ba kin long ki dieng pyngkiang ha ka jingim ka jong ki, hynrei ban trei shitom minot thop khnang kin ïoh kheit ïa u soh jong ka jingjop.
Ka jingïakop pynisap ka long ha ki san bynta kata, ka Young Artists talent Hunt (Dro Jingdro), Young Writers Talent Hunt (Thoh Poetry), Photography Talent Hunt, Declamation Talent Hunt and Cultural Festivals (Ka Jingïathong da ka Kynhun) ha kaba ki nongjop napoh ka District Level kin leit ïa shim bynta sha ka State level.
