Mawkyrwat, ‘Naiwieng 21: Ka ophis jong u Deputy Commissioner, South West Khasi Hills District lyngba u District Disaster Management Authority (DDMA), South West Khasi Hills District u la ai ka jingbthah ïa ki paidbah ba haba pluh ding ki dei ban leh bad bym dei ban leh.
Lyngba kane, u la ai jingbthah ba haba lap ki jingpluh ding ki dei ban phone sha ka ophis jong ka jingpynlip ding (Fire Station), bajan tam mar syn ïohi ïa ka jingsdang ka jingpluh ding bad pyntip ruh sha ka District Control Room. Wat ym ailad ïa ki khyllung khynnah ban lehkai bad ki jingpruid ne jingtbeh ding.
Shuh shuh lada ki jaiñ phong jong phi ki kem ding, wat mareh. Pyntyllun ïa lade ha madan ban pynlip ïa ka ding. Kynmaw lada ki jaiñ phong jong kiwei pat ki kem ding ngim dei han theh da ka um. Ha ka por shet jingshet, wat phong ki jaiñ kiba lah ban kem ding kloi kum ki nylon. Pynlip bha ïa ka ding hadien ba la dep shet.
Ïa ka ka umphniang ne tiar ba lah ban kem ding kloi kum ki umphniang sharak, ki skum ne ki dieng ïap dei ban buh kham jngai na ka dpei ne shawla. Lada ka kamra ka dap da ka tdem, par sha ka jingkhang bad ka khlieh jong phi ka dei ban don kumba shi phut ne ar phut na ka madan khnang ba phut ym ïap-op.
La mana ruh ba ki paidbah kim dei ban bret kulmar ïa ki biri ne sikret ba dang meh ding.
Ki dei ruh ban buh lypa ïa ka borti ba la pyndap da ka um ne u shyiap bad ki siej kiba jrong hajan khamtam ha ka por ba pynbthei ïa ki pataka (Fire crackers) kum ha ka por diwali ne new year bad kumta ter ter. Pynlip noh ïa ki klong ne khiew gas (Cylinder) bad stove hadien ba la dep pyndonkam ïa ki bad dei ruh ban bud thikna ïa ka jingbatai kumno ban pyndonkam bad pynlip ïa ki ruh.
