ïoh kurup kyiad ka Seng Longkmie bad VDP New Nongstoiñ na Mawpun

Nongstoiñ, Naiwieng 21: Wat la ki bor pynïaid shnong jong ka shnong New Nongstoiñ ka la pyrkhing bad maham tyngeh ïa kino kino ki nongshnong shnong ba kin khaïi kyiad ne droks ha poh u pud u sam jong ka shnong, hynrei ki nongkhaïi kyiad beaiñ ki dang don beit.
Kumta ha ka taïew ba la dep ki nongïalam jong ka Seng longkmie shnong New Nongstoiñ ha ryngkat ka jingïatreilang bad ka kynhun pahara shnong (VDP), hadien ba ki la ïoh ïa ka jingtip ba thikna ba ki don ki nongshong shnong na ka kyntoit Mawpun ki la pynlong ka jingpynap shrip, kumta ki la ïoh ban bat noh ïa uwei u nongkhaïi kyiad beaiñ u ba la tip kyrteng kum u Donald Syiem 43 snem ka karta.
Hadien ba ki la ïoh ban bat ïa u ki la pynlong ka jingleit talasi ïa ka ïing sah jong u ha kaba ki la ïoh ban kurup haduh phra synduk ka kyiad pahareng. Hadien ba la ïoh ban kurup, la rah ïa katei ka kyiad bad u tei u nongkhaïi sha ïing dorbar bad la pynlong ka jingtohkit.
Ka kong A.Kharsyntiew president ka Seng longkmie New Nongstoiñ haba ïakren bade u nongthoh khubor, ka la ong ba utei u rangbah u dei uwei na ki nongkhaïi kyiad beaiñ hapoh shnong bad u la shah kem teng ha ka kynhun pahara shnong na ka por sha ka por hynrei um shym la sngeh ïa katei ka kam. Ka la ong ruh ba ïa katei ka kyiad ba la ïoh kurup la buh shuwa bad hadien ba la pyndep ïa baroh ki jingdonkam la leit ban theh noh mynta ka sngi.