Ym lah ban len ha kane ka juk ba mynta ngi im ha ka juk ba la ktah jur ia ka koit ka khiah namar ngi la im ha ka juk ba la pynheh pynsan jubor ia ki jhur ki jhep, ki doh ba ngi bam naduh ki dohkha, doh masi, doh sniang, doh syiar, doh blang bad kiwei kiwei ki jait jingbam tang da ki dawai suda. ïa kane la sakhi ruh na ka jingsan ka rynieng jong ki khun ki kti jongngi tangba kaba sngewsih ka long ba kim don bor satia ban ïakhun la ha ka liang ka koid ka khiah ne wat ha ki jingïaleh kai sport ne wat ha kino kino ki bynta ruh. Balei ba ong kumne ha ka por mynshwa haba ki briew ki dang im beit ha ka jingrep tynrai kata khlem ki dawai dashin, tang da ki sboh eit masi, syiar ne sniang, wat la kim ïoh bam ïa kine ki jait jingbam ha kum kane ka juk ba mynta ki long kiba khiah krat, bad ki khlaiñ ruh ha ka bor met bor phad.
Hynrei mynta lada ïanujor bad kito ki briew ha ki por ba mynshwa bad kiba ha kane ka juk mynta te la i sangsot haduh katta katta namar ka daw ka long ba la bam beit da ki jingbam kiba la pynheh pynsan jubor da ki dawai.
Ban pynshisha ïa kane, wat na ka liang ka National Human Rights Commission (NHRC) ka la lap ha ki jingtohkit jongka ba ïa ki bam ki dih, ki jhur ki jhep, ki soh ki pai, ki doh ba la die ha kylleng ki bynta ka ri ki dei kiba la shu pyndonkam beit da ki dawai. Kumta halor kane ka NHRC ka la shim khia khamtam eh hadien ka jingpynmih khubor jong ki tnad pathai khubor halor ka jinglap jongka tnad kam rep kam riang jongka sorkar pdeng ba ïa ki jaid jingbam bapher bapher la shu ai beit da ki dawai kiba palat ïa kyndon ba la buh ne permitted maximum residue leval (PMRL) kata la ka dei ha ki jhur ki jhep, ki soh ki pai, ki doh bad kiwei kiwei ki jait jingbam bad kane ka jingjur ka jingpyndonkam palat ïa ki dawai ka la jia hapoh kine ki hynriew snem ba mynta.
Kum ka jingshim khia halor kane ka kam kaba ktah ïa ka koit ka khiah ki paidbah, ha ki khyndiat snem bala leit na ka liang u Nongbishar Justict D Murugesan, u dkhot ka NHRC u la ai da ka jingthoh sha ka Chairperson ka Food and Safety Standard Authority of India ((FSSAI) Secretary, Union Ministry of Food Processing Industries bad ki Secretary ba dei peit ïa ka Food and Agriculture jong baroh ki jylla ka ri India ba ki dei ban ai ïa ka kaiphod hapoh hynriew taiew halor kaei ka kamram kaba ki la leh halor kane ka jinglap jongka NHRC ha ki jylla jongki halor ki jingbam ba ki pyndonkam .
Kumba ka long wat ka ïing Bishar ba hakhlieh duh jongka ri ka Supreme Court ka la ka sorkar pdeng bad sorkar jylla ka dei ban bud dien bud ryntih ïa ki kyndon aiñ jongka riti synshar jongka ri ba dei ban bishar bniah ïa ki jait jingbam ba la die ne pynpoi sha ki paidbah namar lada lap ïa kino kino ki jingbam kiba ktah ïa ka jingkhoit jingkhiah jong ki paidbah ka long pyrshah ïa ki kyndon aiñ bad dei ban rah ïa kiba leh beaiñ hahmat jongka aiñ khamtam ïa kito ki kompani ne ki nongpyn mih jingbam kiba pyndonkam da ki kynjah dawai ba ktah pat ïa ki paidbah.
Haba phai sha kane ka jylla Meghalaya kat haduh mynta lah ban ong ba ki bor ba dei peit kim pat lah ban teh lakam ïa ka jingdie ne jingpynmih ne jingshet ïa ki jingbam kiba pynbun da ki dawai, kawei na ki daw ka long ka dei ka jingduna jong ki ophisar ne food inspector ha ka jylla. Wat hapdeng ki jingduna ki don ki Food Inspector kiba shim khia na ka por sha ka por ban leit talasi ïa ki dukan bad lap ruh ïa kiba bun ki jingdie beaiñ hynrei kumba ka paw kat haduh mynta ka sorkar hi kam pat shim khia ban pynshitom ïa kiba kum kitei ki dukan.
Hooid ka sorkar ka buh ïa ka thong ban wanrah ïaka jingkoid jingkhiah ïa baroh, hynrei kumba ka long mynta kane hi ka dei tang ha ka ktien khlem ka kam. Kumta lada ka sorkar ka dei ka sorkar kaba shimkhia da shisha ban wanrah ka jingkhoid jingkhiah ka dei ban pynbun ïa ki ophisar ne ki Inspector ki ban leit talasi ha ki dukan, ki jaka pynmih mar bam bad ki jaka shet jingshet namar dei tang lyngba ka jingbun ki ophisar ba lah ban tem bad wanrah ïa ka jingkhuid jingsuba ha kaba dei ïa ki mar bam. Nalor kane ka sokar ka dei ban thung ruh pat ïa ka Kynhun ka ban peit halor kane namar lehse kin don ki ophisar ki ban leh tam hynrei lada do ka kynhun ba kyrpang kito ki ophisar ne inspector ki ban leit talasi ruh kin nym nud ban leh tam ne shim kabu.
