Lum ka MSOA – GTC ïa ki 22 tylli ki synjuk ïalehkai ha ka jylla

Shillong, Naiwieng 21 : Ka Meghalaya State Olympic Association bad ka Games Technical Conduct Committee ki la kynduh lang hynin ka sngi hapoh ka jingïalam jong u Bah John F Kharshiing ba dei Working President ka MSOA bad Chairman ka GTCC ban ïa kren na bynta ka Meghalaya Games kaban long ha u Kyllalyngkot 2024 ha Tura.
Ha kane ka jingïalang la donlang ruh u Bah Finely L Pariat, General Secretary & Secretary, GTCC, u Bah. PB War Nongbri, Asst Director, DSYA bad kiwei ki heh MSOA ha ryngkat ki President & Secretary jong ki 22 tylli ki State Sports Associations ban ïa thir ïa kren halor ki jingpynkhreh halor ka Meghalaya Games kaba san (5th Meghalaya Games – 5MG2024) kaban long naduh 15 tarik Kyllalyngkot haduh 20 tarik utei u juh u bnai ha u snem ban wan ha Tura, West Garo Hills District.
Kan dei ruh ka sien kaba nyngkong ba ïa ka Meghalaya Games yn rah sha ki District hadien ba baroh saw sien ïa kane ka jingïalehkai kaba heh duh jong ka jylla la pynlong beit tang hapoh nongbah Shillong.
Kumban shu pyn kynmaw ba ha ka Meghalaya Games kaba 4 u Myntri Rangbah u la kyntu ïa ka MSOA ba nangne shakhmat ïa ka Meghalaya Games yn pynlong man ka snem bad katba lah yn pynlong lang sha ki District bapher bapher jong ka jylla kum shibynta ban kyntiew lang ïa ki jaka ïalehkai ha ki District bapher bapher bad u la pynbna ba ka Meghalaya Games kaba san yn pynlong ha Tura, West Garo Hills District bad yn bud biang sha Khasi ne Jaintia Hills.
Ha shwa kane ka jingïalang, ka Organising Committee jong ka Meghalaya Games kaba san (5MG2024) ka la long ha ka 14 tarilk Naiwieng 2023 ha kamra treikam jong Director jong ka tnad Ïalehkai ka sorkar jylla.
Ka kyrwoh na ka Synjuk ka pyntip ruh ba kum shibynta ban pynjanai ïa ki jingpynkhreh kin sa don bun ki jingïalang jong ki committee ki bapher bapher ha shwa ban kut u snem na ka bynta katei ka jingïalehkai kaba heh duh jong ka jylla Meghalaya.
Na ka liang u Bah John kum u Working President ka MSOA u la ong ba ki State Sports Associations (SSAs) ki la long kiba la khreh ban pynlong ïa katei ka jingïalehkai ka sien nyngkong sha ki District bad u la kyrpad ïa ka jingïatrei lang jong baroh ki kynhun ban nym kheiñ than ïa ki jingduna namar ka thong ka long ban pynshlur ïa ka jingïalehkai sha baroh ki district ba kin mih ruh ki jaka ïalehkai sha ki district ba kham kyndong.
Shuh shuh u ong ruh ba kine ki jingïalehkai baroh ki long shibynta ban pynkhreh ruh ïa ka National Games kaba 39 ba ka jylla kan pynlong ha u 2026 lane ha u snem 2027 hadien ka Uttarakhand bad ka Chhattisgarh.
Ha katei ka jingïalang la ïa kren halor ki jingpynkhreh ïa ki jaka ïalehkai, ka tarik ban mih na Shillong bad ban poi sha Tura, ki jaka sah ïa ki lai hajar tam ki nongïalehkai kynthei bad shynrang ryngkat ki team officials bad bun kiwei kiwei ki jingdonkam.