Ki dak thoh Khasi kum u ï bad u ñ la i kumba kin jah noh, ong u MLA ka Mawkyrwat

Mawkyrwat, Jylliew, 23: “Ha kum kine ki por ka ladei biang ka ïa ba ngin hikai biang ïa ki dak thoh Khasi namar i kumba ki la jan jah khamtam eh kum u dak ï bad u ñ kum ka kyntien ‘ñia’ bun ki la shu thoh ‘nia’ ne ‘ïing’ ki thoh ‘ïing”, ong u MLA ka Mawkywat Constituency Bah Renikton L. Tongkhar haba kren kum u kongsan ha ka jingrakhe ïa ka jingdap 183 snem ka jingwan iuh kjat jong u Rev. Thomas Jones ha rilum Khasi ïa uba la ñiew kum u Kpa jong ki Alphabet Khasi.
“Ngi dei ban sngew sarong ïa la ka jong da kaba tip ïa ka thoh ka tar Khasi ba paka khnang ba kan long ka jingïarap ban pynriewspah ïa la ka ktien ka thylliej la jong,” la ong u Bah Tongkhar ha ka jingrakhe ba la pynlong da ka Khasi Authors’ Society (KAS) shnat Mawkyrwat ryngkat ka jingïatrelang bad ka Khasi Department ka Sngap Syiem College, Mawkyrwat ha ka sngi saitjaiñ.
Ka lympung-ïamir-jingtip ka long halor ka phang, “Im ka ktien, Im ka jaidbynriew.”
U la pynkynmaw ruh ba kum ka jaidbynriew Khasi kam dei shuh ka jaidbynriew kaba dang sahdien ne ka bym don ka ktien ka thylliej hynrei da ka jinglen-lade jong u Rev. Thomas Jones ka la pynlong ïa ka jaidbynriew Khasi ban ïoh ïa ki dak thoh ABK kiba paka kiba long ka dawbah ba ki Khasi kin ïoh pule.
Halor ka jingïakhun jong ka Khasi Authors’ Society (KAS) ban dawa ban ïoh ka jingithuh ïa ka ktien Khasi ha ka Khyrnit Baphra, u Bah Tongkhar u la ong, “lada ka ktien Khasi ka ïohrung ha ka Khyrnit Baphra kan long ka jingkyrkhu kaba khraw ba jingmyntoi ym tang ïa ki nongpyndonkam kiba ju kren ïa ka ktien Khasi hynrei wat ïa ki bym nang ruh namar ka ktien Khasi ka long kaba suk bha ban pule bad sngewthuh ïa ka ba ki dak Khasi ki long kiba shai. Lada ka ktien Khasi ka rung ha ka Khyrnit Baphra, nga kob ba dei tang kane ka ktien kaba lah ban pule lut da baroh ki jaidbynriew kiba don hapoh jong ka Ri India watla kim lah ban sngewthuh,”
Shwa kane, u Vice President ka Khasi Authors’ Society (KAS), Shillong Dr. K.D. Ramsiej u la ïathuh ba u Rev. Thomas Jones u poi ha Sohra ha ka 22 tarik, Jylliew 1841. Ha kine ki snem u la peit thuh ïa ka jinglong jingman bad jingïakren ki nong Shella, Sohra bad kiwei de ki shnong bad wat haduh Jaiñtiapur namar ha kito ki snem ki pyndonkam da ka ktien Bengali. Hadien ba u pyrkhat kane ka ktien Bengali ka long kaba eh shisha bad da kata u pyndonkam noh da ki dak thoh ABK bad ym ba u shu wan rah hynrei u da pyntbit ruh ïa lade ban kren, thoh bad pule khasi.
U Rev. Thomas Jones u la seng ruh ïa ki lai tylli ki skul kata ha Mawsmai, Mawmluh bad Sohra ha kaba na kine ki skul u la hikai ïa ka jingnang jingstad kaba la saphriang hapdeng ki jaidbynriew baroh kiba dang sahbiej bad sahdum bad khamtam eh ba kin tip ïa U Blei bad kin pdiang ruh ïa ka Gospel U Khrist.
Ha kaba ïadei bad ki matti kiba u Thomas Jones u la buh ha kane ka Ri Khasi Jaiñtia ki long u la pynmih ïa ka Kitab ba nyngkong ban hikai ïa ka ktien Khasi, ka Kot Tikir, ka Kot u Nongïalam, Ka Gospel U Mathi ne Mathious bad ka kot pule shaphang ka jingkoit jingkhiah, u hikai kumno ban ot-dieng sawdong, lyntang da ka kurat ym shuh kumba trei u mynbarim, u hikai kumno ban shniah bad stah ïa ki maw ban shna ïing, ker kynroh bad shna mawbynna, u hikai kumno ban thang shun da u dewïong ha ka jaka da ki dieng bad kawei pat u la nang pynbha ïa ka rep ka riang jong ka jaitbynriew jong ngi.
Ha ka lympung ïamir jingtip jong ka bynta ba ar la pynïaid da u Bah S.C. Syiemlieh, Vice President, KAS Shnat Mawkyrwat ha kaba ka la don ruh ka jingkren na ki riewshemphang halor ka phang ba la buh kata na u Pastor (Dr) G.P.L. Gadew uba la kren ïa ka phang, “u synñiang u Thomas Jones sha ka Jaitbynriew Khasi,” bad na u Fr. (Dr) loannis War Pakma halor ka phang, “Ka thoh ka tar Khasi ka Ïit-khmih ka Jaitbynriew”.
Ha kane ka sngi, la don lang u President ka Khasi Authors’ Society (KAS) shnat Mawkyrwat Bah S.S. Lyngkhoi, u Pastor L.E. Jyrwa, Kong P.L. Mawnai na ka Khasi Department, Sngap Syiem College ryngkat ki khynnah na ki phra tylli ki skul kiba dei na ka Higher Secondary School, ki nonghikai, ki nongshynshar shnong ryngkat ki dkhot jong ki sengbhalang bapher bapher na ka thaiñ Mawkyrwat.