Ka C&RD Block ka don shibun ki lad jingmyntoi ha kiba bun ki liang: Mawsaw C&RD BDC

Mawkyrwat, Nailar 18: Ka Mawsaw C&RD Block Demand Committee lyngba ka jingïalam jong u Chairman, Bah Commander Shangpliang bad u Secretary, Bah Edilbert Iawphniaw ha ka Lah Sngi U Blei ki la ïoh ban ïakynduh ïa u Conrad K. Sangma uba dei u Myntri Rangbah ka Jylla ban pynbna noh kham kloi ïa ka jingpynkha ïa ka Block ha ka thaiñ Shiliang Um Rilang, kata, ka Mawsaw C&RD Block, kaba ki paidbah ka thaiñ ki la ap khmih lynti mynta la da ki phew snem.
Ïa kane ka jingïakynduh jong ki, ka long ha ka rynsan buh mawnongrim ïa ka surokbah Intermediate Lane na Weiloi-Mawkyrwat sha Rangthong kaba 40 km kaba la long ha Mawkyrwat.
Lah ban kdew ruh ba kane ka jingleit ïakynduh jong ka Mawsaw C&RD Block Demand Committee ka long ruh ban buddien halor ka dorkhas, kaba ka la aiti ha u Myntri Rangbah ha u snem 2025.
U Bah Commander Shangpliang bad u Bah Edilbert Iawphniaw haba kren ha ki lad pathai khubor ki la ai khublei kyrpang ïa ka jingsngew jong ka Sorkar ba ka la shimkhia ïa ka jingdawa ban pynkha C&RD Block ha ka thaiñ Shiliang Um Rilang. Kumta ki la kyrpad ïa ka Sorkar ba kam dei shuh ban dang pynslem namar ba ka ophis jong ka Block ka don shibun kiei kiei ki lad jingmyntoi kiba long ka jingkyrkhu na ka bynta ki paidbah ka thaiñ.