Ka don ka bamsap ba shyrkhei ha ka jingsiew bai jaka ban shna ïa ka High Speed Corridor, kynnoh ka CSWO

Nongpoh, Nailar 18: Ka jingwan jong ka High Speed Corridor ne ka NH-6 ba thymmai na Umïam sha Silchar ka long ka jingmyntoi kaba khraw ïa ki paidbah ka jylla bad kiba leit ba wan lyngba kane ka surok, hynrei ha kawei pat ka liang kala mih ka jingkynnoh ba ka don ka bamsap ba shyrkhei ha ka jingsiew bai lutksan sha ki paidbah kiba don jaka sha kitei ki thaiñ bad kiba shah ktah naka lynti ïaid jong utei u surok.
Katei ka jingkynnoh bamsap kala mih ruh hadien ba ka kong Christable Wanniang General Secretary ka CSWO ka la mih shakhmat ban sei madan ïa ki kam bamsap hadien ba la ïoh ka jingujor na ki paidbah nongshong shnong ha kaba ïadei bad ka surok High Speed Corridor na Umïam sha Silchar ba la pdiang da ka cabinet committee on economic affairs.
Haba kren sha ki lad pathai khubor naka liang ka kong Christable Wanniang ka la ong ha kaba ïadei bad kane ka kynrum kynram kala pyrshang ban wad jingtip na ki paralok ban ioh ka jingtip ba thikna bad kaba paka ha kaba ïadei bad ka jingïaid lynti ka surok na Umiam sha Nongrah bad katkum ka jingpynbna bala pynmih da ka Ministry of Road Transport kala pynkyndit ïaka kum ka nongïalam bala mih ka kyrteng u Rangbah Shnong ka shnong Umeit u Bah Phrandingstar Malngiang ba u don jaka haka lynti ïaid ba mut shna ïa katei ka surok, wat hadien ba kum ki paidbah nongshong shnong ki tip shai ba um don jaka.
Ka la ïathuh bad katkum ka Notification, ka Dorbar Shnong Umeit ka don 7 tylli ki jaka ba shah pynngat bad u Bah Phrandingstar Malngiang u ioh haduh 5 tylli ki jaka, namar kum ki paidbah ki tip shai ba utei u briew um dei uba don jaka bad tip shai ruh ba katei ka dei beit ka jaka shnong u ba la kam trai bad ai jaka kyrteng lade bad halor kane ka kong Christable kala ong ba ki paidbah kim don jingtip eiei halor kane ba ki kam ki jam baroh la dep lut na ka liang ka tnad ba dei peit naduh ka hearing bad sah satang ban pynlait ïaka pisa.
Ka kong Christable kaba dei ruh ka nongshong shnong ka shnong Umeit kala ong baka pyrshah jur ïa kane namar u Rangbah Shnong um don hok ban kam trai ïaki jaka shnong ban pyndonkam bakla haka kyrteng jong u, bad kane ka lah ban don eiei bad ka EC bad kala kynnoh ruh ba kine ki rukom bamsap ki lah ban don kylleng kylleng, namar kat kane ka kam, kam shym don kano kano ka dorbar ruh, ym don ba pyntip hapoh shnong ba la ïoh bynta bad kala kynnoh ba kane ka dei beit ka kam bamsap bad lada kam mih shakhmat la thikna ba une u rangbah shnong un ïoh marwei ïa kane ka pisa.
“Kum ka longkmie ba peit pyrman ïa ka imlang ka sahlang nga la sdang ban phaikhmat sha katei ka western by-pass kaba la dep, ki don bun kiba don bynta naduh ki dalal, ki agent kiba ïoh percentage ban leit thong ïa ki paidbah ban pynheh ïa ki ïing ki jaka ban ioh 10%, nga sngewthuh ba kane ka jingleh ïa kane la donkti naduh ka tnad transport, ki hehkhmut ki hehkhmat ba ki paidbah kila dep jied namar kaba sngewphylla kiba bun kiba ioh jaka ha katei ka shnong hynrei ki paidbah kim tip eiei namar la ioh jingtip ruh ba haka hearing la shu rung tang u rangbah shnong bad ki nongkitkam shnong hynrei ki piadbah kim tip eiei, ha jingshisha ka tnad transport ka dei ban phah sha ka shnong ban khot hearing” la ong ka kong Christable bad kala bynrap ruh ba kane ka dei ka jinglute beit ïaka pisa paidbah bad ka bamsap kaba la donkti lang na baroh ki liang.
Namarkata naka liang ka seng kala aipor ïakaa tnad ba kan leh biang ïa ka hearing sa shisien bad lada kam leh eiei naka liang ka kong Christable kala byrngem ban leit ujor syndon sha ka Ministry of Road Transport and Highways bad shuwa ban ujor naka liang ka seng kan sa leit ruh ban jurip bad tohkit ïaki bynta ha shilynter ka jingïaid katei ka surok bad lada lap ba kim pynbeit ïa kine ki kynrum kynram na ka liang ka seng kala pynkhreh ban ïaid beit shakhmat.