Shillong, Ïaiong 24 : U Myntri Sorkar ka jylla, Bah Kyrmen Shylla ha ka sngi Palei u la pynpaw ka jingsngewkhia halor ka jingshem jingeh jong ki shipai ïada khappud ne ki Border Security Force kumjuh ki shpai ban ïoh jaka ha ka jylla naka bynta ban buh ïa ki ktem ïada jong ki.
Haba jubab halor ka jingkylli halor ka jingma kaba lah ban ktah lada jur ka jingwan kyrthlep ki mynder shapoh ka jylla, u Myntri u la ong, “Ym pat slem, nga kynmaw ba ki (bor pahara) ki kyrpad ban ïoh jaka a ka bynta ba kin lah ban kynriah na ka bynta ban buh ïa ka jaka hikai siat namar ka pynwit ïa ka shnong ba don marjan. Hynrei ki shem jingeh haduh katta katta ban ïoh jaka. Ha kawei ka liang ngi kwah ba ki bor pahara kin don ba ïada ïangi hynrei ngim ai pat ka jaka ba kin sah. Kumta ïano ngin kynnoh? Ka long shisha kaei kaei ka kam kaba eh bha.”
U Myntri u ong ruh ba donkam ban kylli ïalade kumno ban leh, la yn ai ne ynnai ai jaka ïa ki lada ki pan. U ong ruh ba ka long ruh kaba eh kumno kin sah ban ai jingïada ïa ki paidbah lada ym ïoh jaka. “Kumta, nga kyrmen ba ha kawei ka sngi ngin sa ïoh ïa ka jubab halor kane,” u la ong.
Shuh shuh u Myntri u ong ba ka sorkar pdeng ka la shimkhia ban ïada ïa ki paidbah ka jylla kiba sah ha ki khappud.
