Khyrwit ki shipai India, liem san ngut ki lehnoh ba siat ïap ïa ki nongjngohkai ha Pahalgam

Shillong, ïaïong, 24: San ngut ki lehnoh ki la kyllon ïap ha u kuli jong ki shipai India kiba la khyrwit tyngeh hadien ka jingïap jong ki 26 ngut ki nongjngohkai pyrthei ha Pahalgam kiba la shah synreit kuli ha ki lehnoh ha ka sngi Baar mynta ka taiew.
Ïa ki san ngut ki lehnoh ki kynthup ïa lai ngut ki nong Pakistan bad arngut kiba sah ha Jammu and Kashmir ba la ithuh durkhmat, ki dei kiba donkti ban leh ïa ka kam bymman hajan ka shnong Pahalgam.
Ka kynhun tohkit ka la ithuh kyrteng ïa ki lai ngut ki nong Pakistan kum u Asif Fauji (uba tip da ka kyrteng Moosa), u Suleman Shah (uba tip da ka kyrteng Yunus) bad u Abu Talha (uba tip da ka kyrteng Asif).
Katba arngut kiwei pat, ki dei kiba la tip kyrteng kum u Adil Guri, uba sah ha Bijbehara, Anantnag uba la leit sha Pakistan ha u snem 2018 bad u Ahsan uba sah ha Pulwama uba la leit sha Pakistan ha u snem 2018.
U Fauji bad Shah ki dei kiba donkti ruh ha ki jinghiar thma dang shen, kynthup ha Poonch, la pyntip ka kynhun tohkit.
Ki lehnoh kiba donkti ha ka jingsynreit kuli ha ka sngi Baar ha them Baisaran, Pahalgam, ki la kylli shwa na ki paidbah khamtam na shynrang ban pynshisha ïa ka jingngeit niam jong ki da kaba phah pule ïa ka jingduwai Islamic ne da kaba pyni la ki dei neem kiba la shah ot sher, ong ka jingtohkit jong ka Sorkar Pdeng katkum ka jingphla jong kiba la lait im na ka jingshah synreit kuli ha ki lehnoh.
Ki bor synshar jong ka Jammu and Kashmir ki la pyllait paidbah ruh ïa ka dur baladep dro jong ki lai ngut ki lehnoh ba la suba bad pynbna ruh ban ai khusnam 20 lak lada don kino kino kiba ai jingtip shaphang jong ki.
Ïa uwei na ki nongthombor la ithuh kyrteng da ka tnat syntiat ka Sorkar India kum u Moosa, kaba dei ka kyrteng sin, ïa uba la ngeit ba u dei uba donkti lang ha ka jinghiar thma ha u bnai Jymmang, 2024 ïa ka kynhun ki shipai suiñ Indian Air Force (IAF) ha Poonch.
Namar ka jingbym don ki CCTV camera ha them Baisaran, ka kynhun tohkit ka la hap ban shu shaniah ban lum jingtip tang na ki nongjngohkai kiba lait im. La suba ruh ba ki nongthombor ki la phetrieh sha jaka lum jong ka Pir Panjal hadien ka jingpynïap dusmon ïa ki nongjngohkai pyrthei.
Ka kynhun National Investigation Agency (NIA) ba la lamkhmat da u Inspector General Vijay Sakhare ka la don mynta ha Srinagar ban pynlong ïa ka jingtohkit kaba bniah.