Khyrwit ka nemsniew ia bun ki party. Mano ban ïohnong?

0

Ki party bapher bapher kiba don ha ka jylla katba nang iaid ki sngi la ïohi kumba ki sdang ban ktha khlieh na ka daw ka jingiarung ia mih kaba ym ithuh i thaw shuh. Don ki jaka ba ki nongkyrshan ki mih na ka UDP ki rung sha ka NPP don pat kiba mih na ka NPP ki rung sha ka UDP. Don ki jingjia ruh ba ki phet na ka Congress ne na ka BJP, PDF, HSPDP, KHNAM bad kiwei kiwei ki poi sha ki party kaba kim poi pyrkhat ba kin treilang. Kane kadei ka bor jong ka politik ha Meghalaya.
Mano ba lah ban mutdur ba ka Congres kaba don 20 ngut ha ki saw snem shiteng mynshwa kan ym don MLA shuh mynta. Ym tang katta kaba kham i thamula ka long ba na ki 12 ngut ki MLA kiba phet sha ka Trinamool Congress ha ki khyndiat snem, imat na katei ka kynhun ruh kan pharia bun tnad namar ki don katto katne kiban leit sha ka NPP, nangta sha ka BJP bad ruh sha ka UDP. Kumta lah ban ong ba tang na ka sem Congress kata ruh tang na ki 12 ngut ki la sam MLA sha bun tylli ki seng sainpyrthei.
Mynta lada phai pat sa sha ki 5ngut ki MLA kiba sah kiba khlem phet lang bad kitei ki 12 ngut, kine ruh mynta imat kin krad la ka jong ka jong. Kumba ka paw hi lai ngut ba kynthup ia ka MLA Laitumkhrah Kong Ampareen Lyngdoh ka lah ban poi sha ka NPP, kumjuh u MLA ka Shillong West Bah Mohendro Rapsang bad kumjuh u MLA ka Rambrai Bah Kimfa Marbaniang. Ki arngut kiwei pat kumba ka paw hi kata u Bah PT Sawkmie MLA ka Mawlai bad Bah Mayralborn Syiem MLA ka Nongpoh ki lah ban poi sha ka sem UDP. Na ka bynta jong ki hi ka sah sa tang ka por shaei kin leit.
Sa kawei pat ka party kaba ngat lang ha kajuh ka apot kadei ka HSPDP kaba dei kawei na ki party riewlum kaba la rim tam ha ka jylla. Kane ka party kaba don arngut ki MLA ha u 2018 imat ka hap ban leit sha ka elekshon 2023 khlem MLA hadien ba arngut ki MLA jong ka ba kynthup ia u Bah Samlin Malngiang bad Bah Renikton L Tongkhar ki la khih mynta ban leit sha kiwei pat ki party.
Ka HSPDP watla ka donlang ha ka sorkar ba mynta bad baroh arngut ki l aioh ban shong mar shiteng samoi ia ka shuki Myntri Sorkar pynban la ïohi pat ba baroh arngut kim kwah shuh ban don ha ka party ba ki jop ha u 2018. Kumba ka paw sha ka pyrthei hi u MLA ka Sohïong Bah Samlin Malngiang un leit bad pyniasoh sha ka NPP bad u Bah Renik pat un leit ïasoh sha ka UDP khyndiat bnai shwa ka elekshon.
Sa kawei pat ka party kaban duh mar shiteng ki MLA kadei ka PDF, ka party kaba jop haduh saw ngut ki MLA ha u snem 2018. Lada baroh ki iaid. eit kumba pynkhreh arngut na kitei ki MLA kin leit sha ka National Peoples Party bad ki arngut pat ki lah ban neh hajuh. Kitei ki arngut kiban mih ki kynthup ia u Bah Hamlet Dohling ba dei MLA ka Mylliem bad Myntri ha ka sorkar jylla katba uwei pat dei u MLA ka Umsning Bah Jason Lyngdoh Mawlong.
Kumba long haduh mynta ki don ruh ki khubor ba kin don ki MLA kiba lah ban mih noh na ka NPP bad iakhun noh na kiwei ki party tangba kane haduh mynta ym pat lah ban pyntikna ba ka lah ban long. Lehse tang ka por hi kaban batai. Hynrei haba iadei pat bad ka BJP kaba dei ka party ba thaw lang ia ka sorkar synrop kam pat don kino kino ki MLA kiba lah ban mih pynban tang lada u MLA ka Mawphlang Bah Eugene Lyngdoh u la kyntait ban aireng biang.
Haduh mynta hi lda shu peit imat ki party kiban ioh nong kan dei eh ka NPP kaba lah la kumno kumno ban khring kumba 8-10 ngut ki MLA na kiwei ki party katba ka UDP ka lah ban khring kumba 5 ngut ne tam, BJP kumba 2-4 ngut. Tabgba watla ka jingiatan bad ka jingiakhring ka shongshit katne katne ym lah pat ban tip ba na kitei kiban jop thymmai katno ngut pat kiban wanphai biang sha ka bor. Lada dei ba jop tang kumba 75 persen ruh lehse ka la dei ka samoi kaba bha hynrei kumba ka ju jia hi man ka elekshon ka nem sniew ka syllad naphang ym Duna ia ka mar shiteng kaba mut mar shiteng ki MLA ki ju rem noh.
Ym lah ba tip mynta ka samoi 2023 nalor ba k pawnam kum u snem ka jingiaphet seng lehse ka lah ruh ban long ka samoi ba thaw rekod kum u snem ba bun ki MLA kin jop lane ka lah ban long ba bun ki MLA ki lah ban rem. Kane baroh ka shong ha ka jingtreikam bha jong ki bad khamtam ha i shympriah ba khlaiñbor shisnem san snem jong ki paidbah nongshong shnong ka jylla.

Leave A Reply

Your email address will not be published.