Khliehriat, Rymphang 10: Ki nongïalam bad ki dkhot jong ka Federation of Khasi Jaiñtia and Garo People Khliehriat Circle, ha ka jingdon ryngkat lang ki dkhot ka FKJGP Jaiñtia Zone, mynta ka sngi ki la leit ban khynrra ïa ki trading license bad labour licence ïa ki dukan jong ki bar jylla kiba shong dukan ha ki thaiñ Ladrymbai, ki dkhot ka seng ki la lap ba ki don bun ki dukan jong ki bar jylla kiba la khang tala noh ha shwa ban poi ki dkhot ka seng bad la suba ba imat ki la khang tala dei namar ba ki pat biang ki kot ki sla.
U President FKJGP Khliehriat Circle, u bah Michal Chyrmang, u pynpaw ka jingsngew khia halor ka jingai licence pathar ka Jaiñtia Hills Autonomous District Council ïa ki dukan bar jylla kiba kynthup naduh ki dukan die kwai dong, ki dukan rit ruh kiba dang lah ban trei da ki trai jylla, u la ong ruh ba ka seng ka la pynlong ïa kane ka jingkhynra trading license bad labour license ka dei ruh namar ka jinglaitlan ki nong Bangladesh ban rung ban mih beaiñ na ki khappud, namar ka East Jaiñtia Hills District ka dei ka district kaba don ka khappud bad ka ri Bangladesh, kumta ka seng ka sngew khia jur ruh halor ka jingwan rung tuh ki nong Bangladesh.
Ha ka jingkhynra trading locence bad labour licence, ki dkhot ka seng ki la lap ba don ki dukan ki bym pat lah ban pynbiang ïa ki labour licence ïa ki nongtrei bar jylla kumta halor kane na ka liang ka seng ka la ai por ar taiew ïa ki trai dukan ba ki dei ban pynbiang bad halor kane ka seng kan iai buddien.
U Assistant Secretary FKJGP Jaiñtia Zone, u bah Nangkhrawbor Rani, u la kyntu ïa kiwei kiwei ki circle ruh kiba doh ha ri lum Jaiñtia ba kin shim ïa kane ka synjam ban khynra ïa ki trading licence bad labour licence ïa ki dukan jong ki bar jylla, u la ai khublei ruh ïa ki pulit jong ka Ladrymbai Outpost kiba la wan ban ïa synran lang bad ki dkhot ka seng.
Kitei ki nongïalam jong ka seng ki la ong ba na ka por sha ka por ki la dep ban buh jingthoh sha ka JHADC ban khynra trading licence ïa ki dukan bar jylla kiba don ha East Jaiñtia Hills namar ba ka dei hi ka kamram jong ka JHADC, hynrei namar ka jingbym leh eiei ka District Council kumta na ka liang ka FKJGP kam banse ban shim ïa ka synjam ban leh hi ïa kane ka kam khynra trading bad labour licence ïa ki dukan bar jylla “Ha kane ka jingkhynra jong ngi mynta ka sngi, ngi lap ba don bun ki dukan kiba la don ïa ka trading licence tangba kim don pat ïa ki labour licence ïa ki nongtrei, don ki dukan kiba la khang lypa ruh ha shwa ba ngi leit khynra, ha ka jingiohi jong ngi, ngi lap ba ka JHADC ka la shu ai trading licence naphang ïa ki bar jylla namar katkum ka aiñ jong ka District Council Section 10(2)(4) jong ka United Khasi Jaiñtia District Trading by Non Tribal Regulation 1954 ka khanglad ban ai trading licence ïa ki bar jylla lada don ki trai ri trai muluk kiba lah ban trei ïa ka kam, hynrei ha ka jingpeit jong ngi kum ki dukan die jaiñ, ki dukan die juti, ki dukan die kwai, dukan khap sñiuh, la shu ai beit naphang, ngi iohi ba lada ka long ha kane ka rukom ka District Council ka pynkheiñ hi iala ka jong ka aiñ namar ba katkum ka aiñ kam dei ban shu ai licence ïa kum kito ki dukan ba dang lah ban trei hi da ki khasi pnar” ong u bah Michal Chyrmang.
Ki nongialam kiba la ïa don lang ha kane ka jingleit khynra license bad labour license ïa ki dukan bar jylla, ki kynthup ruh ki nongialam FKJGP Jaiñtia Zone, u bah Marhok kynti Marboh, uba dei u Vice President, u bah Nangkhrawbor Rani, Assistant Secretary bad u Organising Secretary, u bah Pharngki Kyndiat, ki nongialam kiba na East Jaiñtia Hills District pat ki kynthup u General Secretary, u bah Emlang Sutnga, Andiwor Pala, Organising Secretary bad u Edwan Dkhar, uba dei u Assistant Information Secretary lem bad ki dkhot.
