Shillong, Nohprah 28 : 16 tylli ki wicket ha ka inning kaba lai jong ka jingïalehkai Ranji Trophy kaba la ïaid ar sngi na ka plate group ka jingïalehkai hapdeng ka Meghalaya bad Bihar hynne ka sngi Balang, ha kaba ka Bihar ka la lah ban teh lakam ïa ka jingïalehkai.
Haba tied biang hynne ka sngi ha madan ïalehkai cricket jong ka MCA, ka Bihar kaba kamai 73 ron duh noh 3 wicket ha ka inning kaba ar, ka lamkhmat ïa ka Meghalaya da 170 ron.
Haba bteng biang ïa ka inning kaba lai kata ka jingkamai 247/7, ka Bihar ka kamai sa 17 ron shwa ba kan duh noh ïa lai tylli ki wicket ba dang sah ha ki 4 over. U Rajesh Bishnoi uba dei u guest professional ka Meghalaya u la khur sa ar wicket ban pyndep da 4 wicket ha ka sngi ba-ar bad pyndep baroh da 6 wicket ai kamai 60 ron.
U Akash K Choudhury u ïoh 2 wicket ai kamai 49 ron kata da kaba ïoh ban pynhap ïa ka wicket u S Gani, uba la shah pynhap noh da kaba kamai 56 ron hadien ba u la tied biang bad ïoh kamai tang 4 ron.
Ka Meghalaya ka la ïalehkai bha ban ïoh pynhap lut baroh ki wicket jong ka Bihar tang hapoh 300 ron hynrei ha ka pali tied kam shym la lah ban kamai ron ha kaba ka la shah pynduna da kaba ïoh kamai tang 19/3.
Hynrei u Raj Biswa uba la bteng biang na kaei kaba u la lah ban ïalehkai bha ha ka jingjop pyrshah ïa ka Sikkim ha ka taïew ba la dep da kaba kamai 56 ron na ki 46 bol, da kaba khyrwit phra tylli ki four bad ar tylli ki six.
U Biswa uba mih ïa ka pali kaba saw da kaba kamai ron lang da 64 ron ha ryngkat u Dippu Ch Sangma. Hadien ba u Biswa u la shah pynhap wicket noh, u Dippu u la bteng ban kamai 52 ron ha ryngkat u Bishnoi. U Bishnoi u la shah pynhap wicket noh da kaba kamai 13 ron bad ka Meghalaya ka la shah pynhap lut baroh ki wicket da kaba kamai 167 ron bad shah lamkhmat da 97 ron.
Ka Bihar ka la sdang biang ïa ka inning kaba ar hynrei ki rangtied sdang ki la shah pynhap wicket kloi hapoh 20 over, bad ïa kitei ki wicket la ïoh ban khur da u Bishnoi (2/19). U Choudhury (1/21) u la ïoh ban pynhap ïa uwei pat hynrei ka Bihar ka la lah ban teh lakam ha ka 3.1 over khlem da shah pynhap wicket.
