Mawkyrwat, Nohprah 27 : Ka Weiloi Football Club ka la long kawei na ki kynhun kaba la poi sha ka thong ka jingjop hadien ba ka la pynliem noh pyrshah ïa ka Mawkynroh Football Club da 2 – 1 kol ha ka jingïalehkai phainal jong ka VI Open Knockout Football Tournament (OKFT) 2022 ba la pynïaid da ka Federation of Khasi Jaiñtia & Garo People’s (FKJGP), Sawsymper Circle, East Khasi Hills District ba la pynlong hapoh madan jong ka St. Ferrendo Higher Secondary School, Sawsymper.
Haba phai ha ka jingïalehkai, la sakhi paidbah ba ha ki minit kiba shakhmat ka Weiloi FC ka la pyni shisha ïa kata ka sap jong ka jingïalehkai ha kaba ka la ñion tyngeh ban ïoh ban pynkhih jar hynrei ki jingthmu kim shym la urlong satai wat kawei ruh. Kumta katba ki minit ki la nang ïaid shakhmat, ka Mawkynroh FC kumno re kumno da ka jingïakhun tyngeh wat hapdeng jong ka jingkhlaiñ jong ka Weiloi FC ka la ïoh ban pynkhih ïa ka jar ha ka minit kaba 21 lyngba u Lam Kurbah bad dei lyngba kane ka kol ka la pynlong ruh ïa ki paidbah nongpeitkai ba kin sdang ban kynhoi da kaba kyrshan ïa la ki jong ki kynhun.
Nangta shuh shuh hadpeng jong ka jingïalehkai, ka Weiloi FC hadien ba ka la shah thep shi kol kam shym la duh mynsiem hynrei ka dang ïa khun tyngeh khnang ban ïoh ban pynphai bad dei ha ka minit kaba 29 ka la ïoh ban pynkhih ïa ka jar lyngba u Basuk Bina bad ïa kine ki kol baroh ki ar kynhun ki la thep ha ka jingïalehkai jong ka kyllastep.
Haba wan phai biang ha ka jingïalehkai jong ka kyllamiet, ka jingïalehkai ka la nangkham itynnad shuh shuh ha kaba ka Weiloi FC bad ka Mawkynroh FC ki la hap ban ïakhun bad pynpoi ïa la ka jong ka kynhun sha ka thong jong ka jingjop. Kumta ha kane ka kynti, ka Weiloi FC ka la ïoh ban pynkhih biang sa kawei pat ka kol kaba ar lyngba u Henry Marboh ha ka minit kaba 51 minit bad dei lyngba kane ka kol ka Mawkynroh FC kam shym lah shuh ban pynphai haduh kaba kut ha kaba ka Weiloi FC ka la khur syndon ïa ka nam jop.
Ha kaba kut jong ka jingïalehkai, na ka liang ki nongpynïaid ki la ïoh ban sam ïa ki khusnam baroh ar tylli ki kynhun kaba jop bad kaba rem ha kaba ka Weiloi FC ka la ïoh rah ïa nam jop da ka khusnam ryngkat ka song pisa kaba T. 1 lak tyngka katba ka Mawkynroh FC pat ka la rah ïa ka khusnam ryngkat ka song pisa kaba T. 50 hajar tyngka.
Ïa ki khusnam shimet, u Eric Kharlyngdoh u la ïoh ïa ka nam kum u ‘rangïalehkai bat bit, u Mebankyrshan Ryntathiang u la ïoh ïa ka nam kum u nongapkol bat bit, u Eldyfast Wanniang kum u ‘rangïalehkai bat bit jong ka lympung bad u Basuk Bina kum u nongthep bun kol ha kaba kine baroh ki dei jong ka Weiloi FC.
U kongsan ha kane ka sngi u dei u bah Dundee Cliff Khongsit, President ka FKJGP Central Body, u bah Rangstarwell Wankhar, Range Officer (ba la shongthait) jong ka Soil & Water Conservation kum u symbud kongsan ha ryngkat ka jingïadonlang jong u bah Aaron Laloo, Consultant Meghalaya Rural Tourism Federation Limited bad kiwei de kiba la shah khot sngewbha.
Lah ban pynkynmaw ba ka thong bad ka jingthmu ba hakhmat eh jong ka Federation of Khasi Jaiñtia & Garo People’s (FKJGP), Sawsymper Circle, East Khasi Hills District ban pynlong ïa kane ka lympung ïalehkai kynjatbol ka long kum shibynta ban pynmih pisa na ka bynta ban ai jingïarap ba pynshna ïing ïa kawei ka longïing ba duk hapoh jong ka dong ka thaiñ Sawsymper bad kumjuh ruh ban kyntiew ïa ka kam ïalehkai jong ki samla jong ha Bri u Hynñiewtrep.
La pynshit pynshngaiñ ïa kane ka lympung ïalehkai kynjatbol da ka jingrwai da ka kynhun Sawsymper Brother Death to Life bad ka jingshad na ka samla Ibashisha Shangdiar.
Ïa ka jingïalang la pynïaid da u bah Runningstar Kharbani, President ka FKJGP Sawsymper Circle, ka jingkren lyngkot na u bah James Kharbani, Chief Adviser ka FKJGP Sawsymper Circle, bud ruh ka jingsam ïa ki khusnam sha ki samla pule kiba la wan shakhmat ha ki jingïaleh eksam bad ka jingkren khublei na u nongpynïaid.
