Shillong, Naitung 08: San ngut ki samla lehkai ka Kick boxer jong ka jylla ki la ïoh ban wanran nam bad ka burom ïa ka thaiñ hadien ba ki la ïoh ban khur haduh san tylli ki takma na ka rynsan lehkai kaba la tip da ka WAKO India National Seniors Masters Kickboxing Championship kaba la pynlong ha Sports Complex Lovely Professional University kaba ha Jalandhar, Punjab, ïa kaba la sdang naduh ka 1 tarik haduh 5 tarik mynta u bnai.
Kine ki nongïalehkai kiba la ïoh ban khur takma ki kynthup ïa u Teimiki Sungoh bad ka Sweety Kumari Thakur kiba la ïoh ban khur takma ksiar, nanta kaAnjelin Ïakai bad ka Banisha Suiam kiba la ïoh ban khur takma rupa. Baroh kine ki dei na ka shnong Shangpung kaba hap hapoh ka West Jaiñtia Hills, katba u Kynsaibor Wahlang na Mawkyrwat South West Khasi Hills District u la ïoh ban wanrah sha ïing ïa ka takma rnong.
Na ka liang jong u Teimiki u la ïoh ban khur ïa katei ka takma ksiar dei ha ka kyrdan ïalehkai Full
Contact hapoh 57 kg. Ka Sweety ka la ïoh ban khur ha ka thup hapoh 40 Kg. Ka Anjelin ka la khur takma ha kyrdan jong ka Light Contact Women hapoh 51 kg bad ka Banisha ka la khur ïa ka namjop ha ka Light Contact hapoh 55kg. Katba u Kynsaibor u la ïoh ban khur ïa katei ka takma rnong ha ka kyrdan ïalehkai Full Contact Below 51 kg.
Haba pdiang pdiang burom ïa kine ki samla kiba la wanran nam ïa ka jylla, na ka liang jong ka Meghalaya State Kickboxing Association ka la pynkynmaw ba naduh u Nailar snem 2017 ki takma ba la khur da ki samla lehkai jong ka jylla kiba ïashimbynta ha ki lympung shabar ka la kynjoh haduh 185 tylli ( kiba kynthup ïa 70 tylli ki takma ksiar, 47 tylli ki rupa bad 68 tylli ki rnong).
Shuh shuh, na ka liang jong ka seng ka la pyntip ruh ba u Shaiborlang Lyngdoh Mawphlang, u wei na ki referee ba dang khynnah ha katei ka tournament u la ïohpdiang ïa ka certified Grade C katba u rangïalehkai kickboxer barim ka jylla, u Mordekai S. Kharpuri u la btin lynti ïa ka kynhun jong ka Meghalaya sha katei ka lympung kum u Coach.
