La pynhap pyrda ïa ka Inter-School Subroto Mukherjee Cup 2023 ha EJHD

Khliehriat, Naitung 09: ïa ka jingialehkai footbal jong ki skul ba la tip kum ka ka Inter-School Subroto Mukherjee Cup football tournament 2023 kaba la pynlong ha East Jaiñtia Hills District, la ïoh ban pynhap pyrda noh hynnin ka Sngi Saitjaiñ jong ka taïew ba ladep ha kaba u Deputy Commissioner, u Abhilash Baranwal, IAS u la long kum u kongsan ha katei ka sngi bad u samla Halen Nongtdu, kapten jong ka kynhun U-20 Indian National Football Team, u dei uba la shah khot kyrpang.
Ha kane ka sngi la ïoh ban pyndep ïa baroh lai ki thup ïakhun jong ki kynthei bad shynrang kiba la bynta ha ki ar kyrdan, kata ha ka thup ïakhun ki khynnah lehkai ba dang hapoh 14 snem ka rta jong ki shynrang ha kaba ka K.B.Memorial School Wapung kan ïakhun pyrshah ïa ka Chiehruphi Secondary School, nangta ha ka kyrdan ïakhun Under-17 jong ki samla lud shynrang, ka Rymbai Presbyterian Higher Secondary School pyrshah ïa ka Wapung Higher Secondary School, katba ha ka kyrdan ïakhun ki kynthei, ka Khliehriat Higher Secondary School pyrshah ïa ka Lotus Secondary School Deiñchynrum.
Ha ka jingïakhun final jong ka U-17 jong ki shynrang, ki khynnah lehkai jong ka Rymbai Presbyterian Higher Secondary School ka la pynliem ïa ka Wapung Higher Secondary School da 2 kol -1 kol.
Haba phai pat sha ka kyrdan ïakhun ki samla lud hapoh ka rta 17 snem jong ki khynnah kynthei, ïa ka namlahduh la rah da ka Khliehriat Higher Secondary School kaba la pynliem ïa ka Lotus Secondary School Deiñchynrum da 1 kol 1– 0 kol.
Ha ka kyrdan ïalehkai jong ki khynnah hapoh ka 14 snem rta jong shynrang, ka K.B.Memorial School Wapung ka la khur ïa ka namlahduh da kaba pynliem ïa ka Chiehruphi Secondary School, bad kane ka la wan ha ka jingïashut ïa ka tie breaker kaba la kut da 3 -1 kol.
Ka Rymbai Presbyterian Higher Secondary School, ka Khliehriat Higher Secondary School ryngkat bad ka K.B Memorial Secondary School Higher kin sa leit ban mih khmat na ka East Jaiñtia Hills District ban ïashim bynta ha rynsan ïakhun jong ka State Level Subroto Cup Football Tournament, 2023 ha ka thup kyrdan ïakhun jong ka Under-17 shynrang, Under-17 kynthei bad Under-14 shynrang kaba yn sa pynlong ha ka nongbah Shillong.
Ha katei ka sngi la ai ïa ki khusnam sha ki Best Player jong ka tournament ha kaba u Bisterly Ksih jong ka Rymbai Presbyterian Higher Secondary School u la ioh khur ïa kane ka khusnam ha ka thup jong ka Under-17 shynrang, katba na ka liang jong ka kyrda ïakhun ki kynthei ïa katei ka khusnam la khur da i Filicia Sympli jong ka Khliehriat Higher Secondary School la pynbna kum ka Best Player ha ka thup jong ka Under-17 kynthei bad u Lyonel Ryngkhlem jong ka K.B Memorial Secondary School ruh la pynbna kum u Best Player ha ka thup jong ka Under-14 shynrang.