Shillong, Nohprah 08: Ka Shillong Lajong FC ka la ïoh ban khur ïa ka jingjop kaba nyngkong mynta ka samoi jong ka I-League 2024-25, ha kaba ka la pynjem khnap ïa ka Rajasthan United FC da 8-0 kol ha ka jingïalehkai jong ka wat kaba saw ha SSA Stadium, Polo, ha ka janmiet sngi U Blei.
ïa kine ki 8 kol jong ka Lajong la thep da u Figo Syndai (3′), Douglas Tardin (17′,51′), Daniel Goncalves (45’+3), Damaitphang Lyngdoh (49′), Marcos Rudwere Genar Silva (61′), ka penalty na u Imanol Arana Sadaba (66′) bad u Hardy Cliff Nongbri (87′) kaba la ai ïa ka jingjop kaba nyngkong ïa ka kynhun hadien saw sien ki jingïalehkai hala ïing.
Kane ka jingjop ka dei ka jingjop kaba khraw tam ha kaba ïadei bad ka jinglah ban thep bun kol jong ka Lajong ha kano kano ka jingïalehkai lympung I-League, la ka long ha la ïing ne shabar. Ka rekor kaba bha tam mynshwa ka dei ka jingïalehkai ba ka la jop da 6-0 kol pyrshah ïa ka Mumbai FC shabar nala ïing ha ka samoi 2014-15. Katba ka jingjop kaba heh tam jong ka SLFC ha la ïing ka la long ha kajuh ka samoi pyrshah ïa ka East Bengal da 5-1 kol.
Watla ka Lajong ka la shngaiñ lypa da kaba lamkhmat 3-0 kol haba kut ka kylla step, hynrei kam shym la sangeh satia ïa ka jingpyrshang thep ha kaba ka kynhun ka la bteng ban thaw ïa ki lad bad ki kabu ban pynthikna ïa ki lai point ba pura ba nyngkong mynta ka samoi.
Na bynta kane ka jingtïakhun, u Head Coach ka Lajong u Jose Carlos Rodriguez Hevia u la sei ïa ka kynhun kaba ym shym la pynkylla na ka jingïalehkai kaba ladep pyrshah ïa ka Inter Kashi, ba la kut ha ka jingïakhaid.
Kane ka jingjop ka la pynlong ïa ka SLFC ban kamai mynta 5 point na ki saw sien ïalehkai, katba ka Rajasthan ka dang ïaineh 3 point; bad kadei ka namrem kaba lai na ki saw sien ïakhun.
Ka Lajong kan dang sah ha la ïing na ka bynta ka jingïalehkai kaba san sien lynter ha la ïing ban ïakhun pyrshah ïa ka Gokulam Kerala FC ha ka 14 tarik u Nohprah ha ka por 4 shiteng janmiet.
