Khur jingjop ka Hurdles Mawsynram bad ka Pomshutia haka EKHCA 4th District League T20 Cricket Tournament
Palat spah ron khyrwit u Maitshaphrang Khongjee na bynta ka Pomshutia
Sohra, Rymphang 14: Ki ar tylli ki jingïalehkai ka lympung 4th District League T20 Cricket Tournament 2024 jong ka East Khasi Hills Cricket Association [EKHCA] ha Sohra, ba la long hynne ka sngi Thohdieng ki la jam sha kaba kut ha kaba ka Hurdles Mawsynram bad ka Pomshutia ki la khur ïa ka jingjop.
Ka Hurdles Mawsynram CC ka la pynliem ïa ka Sportopia CC da 6 wiket ha ka jingïalehkai kaba nyngkong katba ka Pomshutia ka la jop da 8 wiket ïa ka Lumpaia Avengers ha ka jingïalehkai kaba bud bad la sakhi ruh ïa ka jingtbit jong u Maitshaphrang Khongjee uba la khyrwit palat ïa ka spah ron na bynta ka Pomshutia.
Ha ka jingïalehkai kaba nyngkong ka Sportopia CC ka la lah ban kamai 141 ron haduh kaba kut jong ka 20 ober bala mang bad hap 8 wiket hadien ba shimti ban tied nyngkong, ha kaba u Jedilbert Swer u la kamai 32 ron naki 28 bol. U Sando B Rapsang u la khur 2/8 naki 4 ober ha ka bol na bynta ka Hurdles Mawsynram.
Haba wanphai ha ka pali tied ka Hurdles Mawsynram ka la pyndep ban kynjoh tam ïa ka thong da kaba kamai 145 ron naki 17.4 ober bad hap tang 4 wiket. U Macmillan Wahlang u la long uba seisoh ha ka bol na ka liang jong ka Sportopia da kaba khur 1/23 naki 4 ober.
Hynrei ka namtam ka long sha u Sandy Kharshandy uba la khyrwit 61 ron naki 28 bol ban ïalam ïa ka Hurdles Mawsynram ban jop da 6 wiket bad u la khur ruh ïa ka khusnam Player of The Match.
Ha ka jingïalehkai kaba bud, la sakhi ïa ka Lumpaia Avengers kaba la shimti ban tied nyngkong bad kamai 141 ron haduh kaba kut jong ka 20 ober bala mang bad khyllem 7 wiket, u Ibanaibor Lyngdoh u la kamai 35 ron naki 19 bol ha ka tied. Uba la seisoh ha ka bol na bynta ka Pomshutia dei u Mankhraw Ryngksai da kaba khur 3/34 naki 4 ober.
Ka Pomshutia ka la jubab da kaba khyllem tang 2 wiket ban kynjoh ïa ka 142 ron naki 18 ober. U Miquel Obando Nongbri u la ïoh ban khur 1/16 naki 3 ober hynrei u khlem shym la lah ban khanglad ïa ka liang pyrshah ban poi sha ka thong.
Ka jingïaroh ka long sha u Maitshaphrang Khongjee uba la ai mynsiem ïa ka kynhun da kaba khyrwit haduh 110 ron kiba u la kamai naki 60 tylli ki bol kaba la pynthikna ïa ka Pomshutia ban jop suk da 8 wiket. Ha kaba kut u Maitshaphrang Khongjee u la khur ruh ïa ka khusnam Player of the Match.