Nongstoiñ, Jylliew 14: Ka Deputy Commissioner, Eastern West Khasi Hills District ka la pyntip paidbah ba ka Ministry of Home Affairs jong ka sorkar India, ka khot ban thep kyrteng na ka bynta ka Jeevan Raksha Padak Series of Awards 2026.
Kane ka award ka dei kaba la pynkhreh kyrpang da ka sorkar India na ka bynta ki nongshong shnong jong ka ri India kiba leh ïa ki kam shlur kum kaba pyllait im ïa ki briew na ki jingngam jyllop ha um, ki jingjia aksiden, ka jingpluh ding, ka jingshah bat light, ka jingtwa khyndew, ka jingïaleh bad ki mrad khlaw bad ka jingpyllait im ïa ki briew na ka jingsahkut ha ki krem.
Namarkata, la khot ïa ki kmie ki kpa, ki nonghikai skul, ki nongpynïaid skul, ki seng trei mon sngewbha, ki rangbah shnong bad ki nongshong shnong jong ka district, kiba don jingtip bad ithuh ïa ki riewshlur kiba leh ïa ki kam shlur ban pyllait im ïa kiwei, kiba I dei hok ban long ki nongïoh ïa kane ka award, ki lah ban phah ïa ki kyrteng jong ki sha ka ophis jong ka Deputy Commissioner, Eastern West Khasi Hills District ha lane shwa ka 3 Naitung 2026.
