Khñium ki nongjngohkai ba sniew palat ka surok ban leit sha Mawlynnong

Shillong, Nailur, 03: Ki nongjngohkai pyrthei kiba wan na kiwei pat ki jylla ki la khñium haba ki lap ba ka surok ban poi sha Mawlynnong, kata naduh Pynursla sharum ka la sniew bha.
Katto katne na kitei ki nongwan jngohkai ki la ïathuh ba ha ka sien ba ki wan nyngkong ka bai wai kali na Shillong ka poi tang 3,000 tyngka hynrei mynta pat na ka daw ka jingsniew palat ki kali rit kim treh wan bad kumta ki la hap ban wan da ki kali kiba kham heh kiba ka dor ruh ka la jan long arshah.
“Ngi wan biang namar ngi kwah ban ïohi ïa ka dur jong ka Mawlynnong kumno ka long ha ka por Lyiur bad kumno pat ha ka por Tlang,” ong uwei na kitei ki nongwankai.
Da kaba pynpaw ba ka Mawlynnong ka long shisha kum ka kper Eden ha pyrthei, kawei na kitei ki nongwan jngohkai ka la ïathuh ba wat ha ka jingnoh ka rta ka la pyrshang bunsien ban wan sha Meghalaya ban ïoh iuhkjat ha katei ka jaka ba ki briew ka pyrthei ki ïathuh khana lut.
“Katba nga dang don ha lynti shwa ban poi sha Mawlynnong ngi la bynñiaw lut namar ka jingsniew ka surok. Hynrei ynda la poi ha ka jaka, ngi la klet lut ïa kita baroh namar kat shaba phai tang ka jingitynnad nalor ba ngi ïoh ïa ka suiñbneng kaba pyngad,” ong sa kawei ka nongwanjngohkai.
Baroh shi katta ïa ka Mawlynnong la ju tip kum ka shnong kaba khuid tam ha dewbah Asia ha u snem 2003 bad ha ka Ri India pat ha u snem 2005. Hynrei kaba kham itynnad mynta ka long ba katei ka shnong ka la nang ban pynitynnad shuh shuh ïa ki sawdong sawkun da kaba thung da ki syntiew nalor kiwei ki jait dieng ha baroh arliang jong ka surok kali.
Kaba kham khring eh ïa ki nongwan kai khamtam ha kine ki bnai kadei ka jingkup ka mariang da ka jingjyrngam bad ka jingkhuid kaba ym lah ban mutdur ba kan dei shisha ka shnong briew.
Katkum ka jingïathuh da u Rangbah Shnong, Bah Thomlin Khongthohrem, ka jingjop jong ki ban pynneh ïa ka jingkhuid ka long ba ki lah ban pynkohnguh ryntih ïa baroh ki nongshong shnong ban pynkhuid ïa ka shnong ha kaba la mih ryntih naduh ki khynnah rit haduh kiba la san nalor ki nongpynkhuid kiba ka shnong ka buh man la ka sngi.
“Kane ka jingkwah ban lehkhuid ka la rung lut wat ha ki khynnah kiba rit eh kiba tang ïohi wat iwei i plastik ba rit kin tam bad bret ha ki jaka bret niut ba la buh lypa,” u la ong.
Shuh shuh u la pyntip ba mynta naduh ba ki la buh ïa ki jaka sah bad ki jaka bam kiba biang, ki la don ki nongwankai wat na shabar ri kiba wan ban sahkai pyngad.
Hynrei haba jubab pat halor ka jingud jong ki nongjngohkai ïa ka jingsniew ki bynta jong ka surok ha shwa ban poi sha katei ka shnong, utei u Rangbah Shnong u la ong ba ki la dep ban pynsngew ïa kane sha u Symbud Myntri Rangbah ka jylla, Bah Prestone Tynsong uba dei ruh u MLA ka thaiñ ha kaba u la kular ban shimkhia ïa ka kam.