Khluit ka jingïatai nia hapdeng u Conrad bad u Dr. Mukul ha ki kynta jingkylli ha ka Dorbar Mang tyngka

Shillong, Lber 07: Ka Dorbar mang tyngka ha ka sngi Thohdieng la sakhi ïa ka jingïatai kaba khluid hapdeng u Myntri Rangbah ka jylla u Conrad K Sangma bad u nongïalam ka liang pyrshah u Mukul Sangma ha ka kynta jingkylli.
Haba jubab ïa ka jingkylli halor ka jingthung ïa ki consultant da ka sorkar jylla, u nongïalam ka liang pyrshah u la pynpaw ïa ka jingpyrshah halor ka jingslem pat jong u Myntri Ranbah ban jubab da kaba ong ba kane ka dei ka “tactical way” ban leh beiñ ïa ki dkhot ka liang pyrshah ba kin ïoh lad ban buh shuh shuh ki jingkylli.
“Kum u Myntri Rangbah la dep ban jubab bad ngam don jingtip halor kane. Phi la dep ban batai ïa kiwei pat ki kam kaba la shah ïa ngi ban ai lad ba phin buh ki jingkylli bynrap. Kane ka dei ka buit ban shim kai ïa ka por da kaba pynduh ïa ngi ban kylli jingkylli kiba bynrap, ha kaba kane kam dei ka lynti. Kane kadei ka kynta buh jingkylli bad kane ka rukom kam ïahab satia,” ong u Mukul.
Haba jubab ïa kane ka jingkynnoh, u Conrad u la pynrem ïa u nongïalam ka liang pyrshah ba um kwah ban sngap ïa ka jingjubab ha kaba kane ka pyni ba u nongïalam ka liang pyrshah u kwah ban pyni sha ki paidbah ba u la buh bun ki jingkylli.
“Kane ka pyni ba kim sngewbha, kumta ai ba kin buh buh ki jingkylli kiba bun,” ong u Myntri Rangbah da kaba bynrap, “Ki jingkylli kiba la buh donkam ban ïoh ïa ka jingjubab bad jingbatai. Nga khlem pynslem ïa ka jingjubab jong nga. Nga thait ban jubab hynrei nga hap pat ban jubab namar nga don ka jingkitkhlieh. Haba nga ai ka jubab kaba shi laiñ kane kan ym ai lut ïa ka dur ka dar kaba paka. Kane kadei ka kam kaba ngam kwah ba kiwei kin thait ne ba ka jubab jong nga kan pynngiah ïa kiwei.”
Halor kane ka jingïatai nia kaba khluid la hap ban tuklar noh da u Lamphang ka Ïing Dorbar thaw aiñ u Thomas A Sangma da kaba ai lad ïa u Myntri Rangbah ban pyndep ïa ka jingai jubab jong u.