Ka jingpynmih jong ka Sorkar India ïa ka rule jong ka Citizenship Amendment Act 2019 ka la pynkhihwin biang ïa ka thaiñ Shatei Lammihngi bad kumjuh ruh ïa kiwei ki jylla hapoh ka ri India khamtam ha ki bynta ka India bashathie.
Kane ka la pynkynmaw biang ïa ka jingpluh ka thaiñ Shatei Lammihngi ha ki snem ba la leit noh haba ka Sorkar India ka warah ïa ka Citizenship Amendment Bill (CAB).
Ka North East Students Organisation (NESO) ka dei ka kynhun jong ki seng samla pule ka thaiñ Shatei Lammihngi kaba la ieng pyrshah bha mynba ka Sorkar National Democratic Alliance (NDA) ba la ïalam da Bharaitya Janata Party (BJP) ka la wanrah ïa ka jingpynbeit thymmai ïa ka Citizenship Amendment Bill (CAB) khnang ban plie ïa ka jingkhangbah ka ri India ban khot long nongshong shnong ïa ki jaidbynriew na ka niam Hindu, Sikh, Buddhist, Jain, Parsi bad ki Khristan na ka ri Bangladesh, Pakistan bad Afghanistan kiba shah pyntyrha ha ka kyrteng ka niam.
Ka dawbah ba ka NESO ka la ieng pyrshah ïa kane ka aiñ ka long namarba ka thaiñ Shatei Lammihngi ka dei kaba don markhap bad ka ri Bangladesh. Kane ka long ka jingplie lad ïa ki jaidbynriew heh paid na ka ri Bangladesh ban tyllep ïa ki jylla ka thaiñ Shatei Lammihngi kiba duna paid haduh katta katta.
Ka jingrung tuh jong ki mynder ri na ka ri Bangladesh sha ka thaiñ Shatei Lammihngi lyngba ka jylla Assam ka long kaba shyrkhei bha haduh katta katta. Wat ha ka National Register of Citizens (NRC) ba la leh da ka Sorkar Assam ki don palat 20 lak ngut ki briew kiba shong basah ka jylla Assam ki bym don kyrteng. Kane ka ladei lypa ka jingma kaba ap ïa ka jylla Meghalaya bad ïa kiwei kiwei ki jylla ha ka thaiñ Shatei Lammihngi na ka jingrung kyrthep bad rung beaiñ jong ki mynder ri na ka ri Bangladesh.
U Myntri Rangbah ka Jylla u Conrad K. Sangma ha ka jingïakren bad ki lad pathai khubor ha ka sngi Baar u la ong ba ka Citizenship Amendment Act 2019 kan ym treikam satia ha Meghalaya namarba ka hap hapoh ka Sixth Schedule hynrei ka aiñ ka treikam tang ha ki jaka Municipal ne ki Non-Schedule Area.
Hynrei ka jingpyrshah jong ki sengbhalang bad ki kynhun bapher bapher ka long namarba ka Sixth Schedule kam treikam bad ka tehlakam satia ïa ka jingwanrung jong ki myndei ri bad ki bar jylla shapoh kane ka jylla. Ka jingkharoi jong ki mynder ri kiba rung tuh lyngba ka khappud jong ka Jylla bad ka ri Bangladesh ka long kaba shyrkhei bha haduh katta katta namarba ki don ki jaka ha khappud kiba ka Sorkar kam pat lah ban ker ïa ki sainar shiah watla ki paidbah kiba shong basah ha khappud ki byrngem byrsit ïa ki mynder ri kiba wan rung tuh shapoh ka jylla Meghalaya lyngba ka khappud.
Watla ki paidbah ka jylla Meghalaya ki la dawa ïa ka Sorkar India ban ai jingmynjur na ka bynta ban pyntreikam ïa ka Inner Line Permit (ILP) hynrei haduh mynta ka Sorkar India ka dang buh sha kyndong almari jong ka Ministry of Home Affairs ïa ka Resolution ba la mynjur da ka Ingdorbar Thawaiñ ka Jylla ha u Nohprah, 2019.
Lada ïakren ïa ka jingshisha ka thaiñ Shatei Lammihngi ka jingjyllei jong ki mynder ri ka jur bha haduh katta katta. Lada peit ïa ka Assam, ka jingpyrshah jong ki paidbah Assamese ïa ka CAA ka dei namarba ki la ïohi ïa ka jingkharoi kaba la palat liam jong ki mynder ri kiba rung tuh lyngba ka khappud ka Assam bad ka Ri Bangladesh.
Haba bishar bniah ïa ka jingkharoi ki mynder ri ha Meghalaya ka la ktah haduh katta katta ïa ka khih ka kamai, ka ïoh ka kot namarba kine ki knieh ïa ka pliangja jong ki trai shnong kiba long ki trai ri trai muluk jong kane ka jylla bad ha kiwei ki jylla ka thaiñ Shatei Lammihngi.
Lada u Myntri Rangbah ka Jylla u ong ba ka CAA kam don jingktah eiei ïa ka Jylla Meghalaya, hynrei ka Sorkar ka dei ban pyrkhing ïa ka jingrung laitlan jong ki mynder ri bad ki bar jylla khnang ba kan ym ktah ïa ki trai shnong ka jylla kiba la nang kylla rit paid ha la ka jong ka ri.
