Pyrkhing ka Commissioner of Food Safety ïa ki nongdie doh ban bud ryntih ïa ki kyndon aiñ
Jowai, Lber 13 : Ka Ophis jong ka Assistant Commissioner of Food Safety, West bad East Jaiñtia Hills Distrik ka la pyntip paidbah khamtam ïa ki nongdie doh (dohmasi, dohsyiar, dohsniang, dohblang, dohkha bad kumta ter ter) bad kumba la kdew na ka por sha ka por na ka liang ka Ophis ïa ki jingdonkam ba hap ban pyndep bad bud pyrkhing khnang ban kohnguh ïa ka ORDER jong ka Meghalaya High Court badon burom lyngba ka PIL No.2 jong u 2021 tarik 14.06.2022 bad 20.05.2022 bad PIL No. 7 tarik 17.08.2023 ba kane ka jingpynbna kan long ka lad kaba khatduh ba ka Ophis jong ka Assistant Commissioner kan ai por ïa ki nongdie doh ban pyndep ïa ki jingdonkam kumba la kdew ha ki NOTICE ba la sam sha ki nongdie doh:-
Ki nongdie doh kin hap ban register ïa ki dukan jong ki bad ka Food Safety Department (FSSAI). Ki nongdie doh ki bym pat siew ïa ka “FINE” hadien ba ki la ïoh “NOTICE” ba ki lah shah daiñ kuna, kin hap ban siew noh wut wut wat lada kila pynbha pynmiat ïa ka dukan jong ki.
Ki nongdie doh kiba don harud surok ki dei ban kah ïa ka dukan nakhmat bad na ki liang kiba ïohi briew da ka ïit ïong kaba 40% -50% khnang ba ki briew kiba ïaid lynti kin nym ïohi ïa ka doh ba don shapoh. Kum ka nuksa, kin thoh da ki dak saw, “Hangne die doh sniang”, etc.
La khang pyrshah ban buh lane wah lyngkrang ïa ka doh ha ki dukan khamtam da ki dukan ba don harud surok hynrei ban buh halor ka kynja miej ne ka jaka ba long hajrong. Ki dukan ki dei ban da lehkhuid bha (hapoh ka dukan, sawdong ka dukan bad kumjuh ruh kum ki nongdie doh). Ia ka doh ba die dei ban buh bha ban lait na ka jingboi ki skaiñ bad pum pum, kum ha ki fridge, ki khiew, ki dabor wat ha ki showcase/synduk lane ki jingker khamtam lei lei ïa ki dukan ba don harud bad hajan surok.
Iaki showcase dei ban da shna bha da ki lyntang dieng kiba bha bad ymdei da ki lyntang snep dieng ba lah ban ïoh na ki kharkhana ot dieng ki bym paka. Ki dieng lyntang ba pyndonkam dei ban da polish bad ai rong bha khnang ban suk ban pynkhuid.
Ki ïit ba pyndonkam ki dei ban bit syndam bad ka lyntang ym kaba lah ban sei na ka por sha ka por.
Ki dukan kiba don sha jngai ki surok/highway lane kiba don hapoh ki ïew ki lah ban don ki showcases kiba da ki jar bani (khnang ban leit rung ki skain), bad ïa ki jar dei ban da ai rong ban ïada na ka jingsarang jong ki jar. Lada ïa ki dukan ym lah ban shna da ki tiles na ki daw ki bapher bapher, ki nongdie ki lah ban ai rong ïa ki dukan jong ki da ka rong ba lah ban sait manla ka sngi.
Kumta ka Ophis jong ka Assistant Commissioner of Food Safety, West bad East Jaiñtia Hills kan ai por haduh ka 31 tarik u bnai March 2024 ba phin bud pyrkhing bad ban pyndep ïa baroh kine ki jingbthah ban lait na ka jingshah file case ha Court.
Kumjuh ruh ïa baroh ki dukan ba die marbam (Restaurant, Dhaba, Fast Food, Dukan sha, Bakery, Grocery, Dukan jhur, Guest house bad kumta ter ter) kin hap bad register ïa ki dukan jong ki bad ka Food Safety Department (FSSAI) hapoh ka 31 tarik u March 2024.
Sa kawei ruh, lada lap ba kino kino ki dukan ki don ïa ki mar bam kiba lah kut tarik lane expired food item, ïa ki mar ba la kut tarik yn kem (seized) noh da ka Ophis jong ka Assistant Commissioner of Food Safety khlem kano kano ka warning hadien ka 31 tarik March 2024. Lada don kino kino ki marbam ba lah kut tarik, ki nongdie kin hap ban buh ïa ki ha kyndong kaba don ruh ka jingthoh ha kynroh, “EXPIRED FOOD ITEMS/DAMAGED FOOD PRODUCTS.”
Kane ka dei ka JINGPYNBNA ka ba long ruh ka NOTICE ba kumba la kdew haneng ka Ophis ka khmih lynti ba baroh kin iatreilang na ka bynta ka bha ka miat ki marbam mardih ha ki ïew ki hat da ka ba bud pyrkhing bad pyndep ïa kaba donkam hapoh ka 31 tarik March 2024, khnang ban lait na kano kano ka jingpyn shitom katkum ka Aiñ hadien habud.