Sha ka phainal rung ka Golden Lion FC ha ka XVI MIFT 2023 – 24 ha madan Rowell Lyngdoh Stadium

Mawkyrwat, Lber 13: Ka Golden Lion Football Club ka la rung sha ka phainal hadien ba ka la pynliem noh ïa ka 7 Wasa Football Club ha ka lympung ïalehkai Semi-final 2nd Leg jong ka XVI Mawlangwir Invitation Football Tournament 2023-‘24 ba la pynïaid da ka Mawlangwir Sports Club ha Madan Rowell Lyngdoh Stadium, Mawlangwir South West Khasi Hills District.
Ha kane ka jingïaknieh ban poi sha ka phainal kaba la long mynta ka sngi, ka Golden Lion FC ka la ïoh rah ïa ka nam jingjop lyngba ka jingïaleh ha ka Tie Breaker 5 – 4 pyrshah ïa ka 7 Wasa FC.
Ban shu pynkynmaw, ka 7 Wasa FC ha ka Semi-final 1st Leg ka la ïoh ban thep 3 – 1 kol ïa ka Golden Lion FC bad mynta ka sngi ha ka Semi-final 2nd Leg ka Golden Lion FC pat ka la ïoh ban thep 2 – 0 kol pyrshah ïa ka 7 Wasa FC bad ha ba kheiñ ha ka jingïathep kol ka la poi ha ka jingïakhaid kaba long mar 3 kol.
Namarkata, ki nongpynïaid ban rai ïa ka kynhun ka ban poi sha ka phainal ki la pynlong da ka Tie Breaket ha kaba ka Golden Lion FC ka la tam noh da 1 kol.
Shuh shuh ka Golden Lion FC ka la ap ban ïa kynduh sa ha ka phainal kata ka long na ki ar tylli ki kynhun ïalehkai la ka long ïa Shillong Lajong FC ne ïa ka KMC Sonapur Assam ka ban sa knieh ha ka Semi-final 2nd Leg ka ban sa long ha ka 21 tarik u Lber, 2024 ha ka juh ka madan.