Khliehriat, K’lyngkot, 14: Ki Pulit jong ka East Jaiñtia Hills District hadien ba la ïoh jingbit na ka District Court, ha ka sngi Saitjaiñ ha ryngkat ka jingsakhi lang u Magistate bad u Doctor ki la khlong biang ïa ka metïap jong u Bah Riew Siangshai, uba la don kumba 40 snem ka rta na ka shnong Moolang, East Jaiñtia Hills District, ïa uba la suba ba u la khladnoh hadien ba u la hap ha krem dewïong katba u dang tih ïa u dewïong.
Ka thymmei khubor ka ïathuh ba kane kane ka la jia ha ka 9 tarik mynta u bnai ha kaba la suba ba u Bah Riew Siangshai u la mynsaw jur na ka jinghap hapoh ka krem dewïong katba u dang tih dewïong.
Ki bahaïing hasem ki la kit marmar ïa u sha Woodland Hospital, Jowai bad u la khlad noh namar ka jingjur shaba palat ka jingmynsaw bad halor kane ki Pulit ki la register case ha ka 10 tarik mynta u bnai bad ïa ka met jong une u rangbah la tep noh da ki bahaïing sem ha ka sngi kaba u la khladnoh.
U Superintendent of Police jong ka East Jaiñtia Hills District u Giri Prasad, u la ïathuh ba ha ka sngi Saitjaiñ la khlong biang ïa ka met jong u Bah Riew Siangshai bad la lah ban pyndep ruh ïa ka Postmortem bad mynta ki Pulit ki dang ap ïa ka kaiphod jong ka Postmortem bad kat haduh mynta ka jingtohkit ka dang ïaid shakhmat.
