Manipur, K’lyngkot, 14: Ka Seng Congress ha ka sngi u Blei ka la sdang ïa ka Bharat Jodo Nyay Yatra na ka shnong Thoubal, Manipur.
U President ka seng Congress u Mallikarjun Kharge bad u MP ka Congress u Rahul Gandhi ki la kaweh lama ïa kaneka jingïaid kjat ha ka jingïalang kaba la long ha Khongjom, Thoubal.
Ha ka jingpynbna paidbah ïa kane ka jingïaid kjat ba la ïashim bynta lang da ki nongïalam ba khmat jong ka seng Congress, la sakhi ba u Rahul Gandhi u la sangah tyngeh ïa ka Sorkar BJP halor ka jingïaumsnam ha ka Jylla Manipur.
U Rahul Gandhi u la kren ruh shaphang ka jinglong jingman ha ka jylla Manipur bad pynpaw ruh ïa kaei kaba u la sakhi ha ka jingleit jngoh ïa kane ka jylla hadien ba la khie ka jingïaumsnam hapdeng ki ar jaidbynriew.
“Nga la don ha ka jylli jong ka saiñpyrthei naduh u snem 2004 bad ha ka sien banyngkong eh nga la leit jngoh ïa ka jaka ha India ha kaba ki jingtei jong ka synshar khadar ki la khyllem. Hadien ka 29 tarik, Jylliew, ka Manipur kam long shuh kum ka Manipur, ka la shah phiah bad ka jingisih ka la saphriang kylleng, da ki lak ngut ki briew ki la duhei ïa la ka jong ka jingim. Ki briew ki la duhnoh ïa la ki jong ki baieid bathoiñ hakhmat ki khmat jong ki. Bad mynta, u Myntri Rangbah ka ri India um shym la wan ban ñiad noh ïa ki ummat jong phi bad ban bat ïa ki kti jong phi. Ka long ka jinglehraiñ. Lehse na ka bynta u Myntri Rangbah, ka BJP bad ïa ka RSS, ka Manipur ka dei ka bynta jong ka ri India,” la ong u Gandhi.
U Rahul Gandhi u la ong ba ka Manipur mynta ka la kylla long ka dur jong ka politik jingisih ka BJP mynta.
“Ka Manipur ka dei ka dur jong ka jingleh politik ka BJP, ka Manipur ka dei ka dur jingisih jong ka BJP bad ka RSS. Ka Manipur ka dei ka dur jong ka jingsngew bad ka saiñpyrkhat jong ka BJP,” la ong u Rahul.
U Rahul shuh shuh u la ong ka party Congress kan pynthikna ba ka shongsuk shongsaiñ kan wan phai biang sha ka jylla Manipur.
“Phi (paidbah) la duh noh ïa kaei kaba phi ñiew kordor bad ngin sa wad ïa kaei kaba phi la kheiñkor sa shisien bad ban ai biang sha phi. Ngi sngewthuh ïa ka jingpang jong ki paidbah ka jylla Manipur kaba ki la mad. Ngi sngewthuh ïa ka jingmong, ïa ka jingduhnoh bad ka jingsngewsih kaba phi ladep mad. Ngi kular ïa phi ba ngin sa wanrah biang sha phi ïa kaba phi la kheiñkor, ngin wanrah biang ïa ka shongsuk shongsaiñ, ïa ka jingieid ba kane ka jylla ka don,” ong u Rahul.
Hadien ka jingïaid lynti kaba katto katne por, la shongthait ha iew Koirengei ha Imphal bad ka kynhun ïaid lynti kan sa sahmiet ha Koujengleima Sports Association Football Ground ha Sekmai, Imphal.
Ka Congress ka la pynshai ba ka jingthmu ha ka jingpynlong ïa ka jingïaid kjat ka long ban pynkut noh shisyndon ïa ka “anyay kaal” (ka juk jong ka jingshah leh bym hok) hapoh ka sorkar ba la ïalam da u Narendra Modi, shwa ban poi ka elekshon Lok Sabha.
U Rahul un ïalam ïa kane ka Yatra ka ban shimpor haduh 67 sngi, da kaba buh hakhmat ïa ka jingthmu ban ïakynduh markhmat bad ki kynhun bapher bapher, ki nongrep, ki nongbylla, ki Dalit, ki riewlum bad kiwei kiwei.
Kane ka jingïaid lynti kan kynjoh haduh 6,713 km da kaba shong da ki Bos bad lyngba ka jingïaid kjat, ban ïaid lyngba na ki 100 ki Lok Sabha Constituencies ha ki 15 tylli ki jylla, 110 tylli ki District ha ki 67 sngi.
Ïa kane ka jingïaid lynti yn sa pynkut ha Mumbai ha ka 20 tarik lane 21 tarik Lber.
